Hnam pơgang Nhi đồng 1 (pơlei tơm Hồ Chí Minh) ‘nao dŏng hơrih 1 ‘nu hơioh drŏ kăn 12 sơnăm (oei tơ̆ dêh char Trà Vinh) đei blơ̆ yuh pơ lŏ lĕch đe ăl đei hlôi lĕch pham trong klak, ƀôh hơbăn ưh kơ tôch. Ƀak si Phạm Văn Quang - Kơdră khoa Hơmet jĭ ăl, Hnam pơgang Nhi đồng 1 roi tơbăt, ‘nâu jĭ bơngai jĭ pơlŏ lĕch đe blơ̆ yua đơ̆ng hiong pham trong klak ăl, pha hăm găh lơ bơngai blơ̆ yua đơ̆ng ưh kơ ‘lơ̆ng tơ̆ klơm, plei lĕn. Tơdăh ƀĭch tơ̆ hnam pơgang klui, hơmơt kơ hơioh lôch tôch kơ dêh:

“Jĭ pơlŏ lĕch đe pơm ăn pham krăl kơna mon đei ƀôh hơbăn ưh kơ tôch. Mă 2 ‘noh jĭ yua đơ̆ng hơioh đei lĕch pham trong klak kơna nhôn pơm nội soi kơ̆p kư̆u. Tơdrong pơlŏ lĕch đe ƀơm lơ lơ̆m hơkâu kơna bơ̆n athei găn pham đei tơ̆ dôm hơnih lĕch lơ, oei dôm hơnih nai oei lĕch tŏ lĕch, hơdrin ƀôm tơmơ̆t pơgang vă tơgŭm găn pham lĕch. Đơ̆ng rŏng ‘noh nhôn pơma dơnuh hơlen hăm Hnam pơgang Pham păng ƀet tơmơ̆t pham vă ƀet pơgang chăl ‘nao tơgŭm pham krăl dơ̆ng”.

Hnam pơgang Nhi đồng pơlei tơm kŭm ‘nao hơmet tơtom 1 ‘nu mon drŏ kăn 5 khei đei blơ̆ đơ̆ng jĭ pơlŏ lĕch đe ăl, pham krăl dêh. Hơdrol ‘noh, mon đei yuh dêh 3 năr, đei hơlen lăng jĭ jơ̆ng ti ƀơ̆r tơ̆ anih jang pơgang pơm kơdih. Truh năr mă 4, đơ̆ng đơ̆ng đĭ dă ƀiơ̆ kơ yuh, mon tep hơ ƀlăk, brơ̆p đĭ, hơ ‘nơ̆k ưh kơ jăng, hăk lĕch đak găm, pham krăl ăl. Gơnang đơ̆ng hơmet nơ̆ng hăm chuên si rôm tơ jră pham krăl, dôm tơmam pham păng tơgŭm dui jơhngơ̆m, đơ̆ng rŏng 3 năr, hơioh hlôi hoei pă krê hơmơt.

Ƀak si Nguyễn Minh Tiến, Phŏ Kơdră vei lăng Hnam pơgang Nhi đồng pơlei tơm roi tơbăt, tơdrong bơngai ‘nâu ‘noh roi tơbăt găh tơdrong jĭ pơlŏ lĕch đe tơ̆ hơioh iĕ:

“Nhôn ling lang athei kơchăng, ƀak si tơtă ăn bơngai jĭ đei dôm ƀôh jĭ klak, ưh kơ hiôk, lĕch pham muh, pham ƀơ̆r, jơ̆ng ti tơngiĕt, tep blêk, hơioh ƀĭch 1 hơnih ưh kơ pơ ngôi, hăk lĕch pham, chă pơ yơ̆ng ĭch găm. Lăng, đei ƀôh dôm tơdrong ‘nâu ‘noh athei ba hơioh năm hloi tơ̆ hnam pơgang, jô̆ hloi bơngai ‘lŏ jĭ.”

Tơ̆ Hnam pơgang Nhi đồng 2, kơsô̆ bơngai jĭ pơlŏ lĕch đe ƀĭch tơ̆ hnam pơgang đĭ tŏk hloh 2 ‘măng pơting hăm giĕng hơdrol. Mŏ Nguyễn Thị Lan, tŏk bŏk vei kon iĕ hnam pơgang Nhi đồng 2 roi tơbăt, pơđĭ 3 ‘nu kon sư tă kơ jĭ pơlŏ lĕch đe ngăl:

“Hnam nhôn kŭm đei 1 pôm bô̆i mong đak, pơdơh he hơioh oei tơ̆ hnam lơ ưh kơ đei năm lĕch tơ̆ ‘ngoăih. Kon hơdrol ‘noh ĭnh ưh kơ tơchĕng ‘noh jĭ pơ lŏ lĕch đe. Truh năr mă 2 hơlen lăng pham ‘noh jâu pơlŏ lĕch đe. Dôm ‘nu đơ̆ng rŏng kŭm ƀôh thoi noh kŭm jâu jĭ pơ lŏ lĕch đe”.

Kiơ̆ kơ Khŭl jang dăr hơlen jĭ tơpoh kơ pơlei tơm Hồ Chí MInh, đơ̆ng blŭng sơnăm truh dang ei, kơsô̆ bơngai jĭ pơlŏ lĕch đe Dengue đĭ tŏk hloh 3 ‘măng pơting hăm khei ‘nâu sơnăm 2024 (tŏk vă jê̆ 4000 ‘nu). Dôm hnam pơgang đĭ chih iŏk vă jê̆ 300 ‘nu jĭ ăl ( lơ̆m noh hloh 1 puăt ‘noh đơ̆ng dôm dêh char, pơlei tơm nai năm hơmet). Dang ei pơlei tơm tam mă chih iŏk bơngai lôch yua đơ̆ng jĭ pơ lŏ lĕch đe.

Anih vei lăng găh jang pơgang pơlei tơm Hồ Chí Minh roi tơbăt lê̆ hơdrol, jĭ pơ lŏ lĕch đe pơ tơm tŏk lơ̆m tŏk bŏk 6 păng tơchĕng hơdrol gô pơdui đunh truh đĭ khei 10 rim sơnăm. Vă kơchăng tơ jră jĭ jăn, dă ƀiơ̆ kơ đei bơngai lôch, rim khŭl jang, tơpôl păng đĭ đăng kon pơlei bơ̆jang kiơ̆ dôm trong jang tang găn jĭ pơlŏ lĕch đe Dengue.

Anih jang pơgang krao hơvơn kon pơlei kơchăng bơ̆jang kiơ̆ dôm trong jang tang găn jĭ hơnơ̆ng. Mă hơdăh ‘noh, kăl kơ đơ̆p hlom dôm tơmam mong đak yua, pơdŭ, akŏm păng hŭt lê̆ dôm tơmam ưh pă yua gô pơm ăn đak tơ̆ng đei ƀôh klanh nhen bơ̆n kơ ƀĭnh tăh pơ rŏ pơkao, lôp gre so....

Bơ̆ jang kiơ̆ pơm rơgoh cham char jum dăr hnam, klơ̆p hlom hơnih đak tơ̆ng, tep kơmŭng, yua kơ ƀĭnh pret, kem dăh mă ‘ong tơpuh mur. Mưh đei ƀôh yuh, kăl kơ năm hloi tơ̆ hnam pơgang vă khăm păng hơmet tơtom, ‘nĕ kơ chă hơmet kơ dih tơ̆ hnam.