Akŏm đĭ đăng tơmam jang đei (GRDP) kơ dêh char tŏk 7,49%. ‘Nâu jĭ kơsô̆ tôch hơiă, mă loi jĭ mưh dêh char ‘nao tơmât đang anih jang vei lăng, kăl đei jơnăr vă hơmet pơ ‘lơ̆ng khul kơdră pơgơ̆r păng trong vei lăng. Akŏm đĭ đăng jên mong kơ teh đak đei 13.656 ti, tŏk 37,3% pơting hăm khei âu sơnăm sơ̆, lơ̆m noh hơdrô̆ tơ̆ Bình Định tơgop dang 10.000 ti. Jên tĕch tơmam tơ̆ teh đak đe đơ̆ng dêh char đei 1,686 ti USD, tŏk hlŏh 21%.

Kơdră Anih vei lăng kon pơlei dêh char Phạm Anh Tuấn athei akŏm jơhngâm hơtŏk tơdrong jang kiơ̆ kơmăy sô̆ lơ̆m rim anih vei lăng, pơm ‘lơ̆ng ăn dôm tơdrong hơgăt găh mŭk drăm – tơpôl đei tơlĕch jang đei yoa đơ̆ng dêh char truh tơ̆ tơring. Kơdră chĕp kơ̆l dôm anih jang kơpal athei chĭu pŭ hăm dôm tơdrong jang ưh ‘lơ̆ng, atŭm hăm ‘nŏh athei pơtho tơƀôh trong jang mă hơdăh ăn dôm tơring, pơm lăp hăm tơdrong ‘mĕh vă jang tŏk mŭk drăm – tơpôl păng pơvih ăn kon pơlei.