Hăt hot pơhrăm hơsuang atŭm hăm đe buăl tơ̆ Hnam hơkŭm joh ayŏ ăn đe hơ-ioh Đăk Lăk, oh Nguyễn Thục Quyên, 13 sơnăm oei tơ̆ phương Ea Tam, pơlei tơm Buôn Ma Thuột ăn tơbăt, đơ̆ng rŏng pơtôch sơnăm hŏk, oh hlôi chih akŏm tơdrong vă jang vă đei jơ năr pơdơh he 'lơ̆ng hơ-iă kăp gĭt. Dang ei, Quyên hlôi chih măt pơhrăm 2 lăm hŏk gah tơdrong gơh dơ̆ng tơ̆ hnam hơkŭm joh ayŏ: “Lơ̆m khei ou inh pơhrăm teh sŏk iĕr păng tơplŏng kơdou tơ̆ ou, oei 2 khei đơ̆ng rŏng noh inh hŏk he, hŏk Toan păng nơ̆r Anh. Truh khei 8 inh chă tơmang tơ̆ Gia Lai. Sơnăm ou mĕ mon chih măt ăn pơhrăm 5 năr 4 kơmăng tơ̆ hnam chua Liên Trì tơ̆ Gia Lai, vă kơ mon da ƀiơ̆ kơ hrat đơ̆ng rŏng minh sơnăm hŏk đunh khei năr”.

Vă kon hơ-ioh đei minh pơyan pơdơh he kăp gĭt, lơ mĕ ƀă hơ-ioh adoi tơchă hơlen păng chih măt hŏk pơhrăm lơ tơdrong. Akŏm jang he tơ̆ Đăk Lăk ưh hơdrô̆ pơsô̆, pơhrăm mă oei tơgŭm ăn đe hơ-ioh găn ƀiơ̆ tơdrong yua kơmăi điê̆n tưh păng tang găn dôm tơdrong pơsuh pơm rơka hơbur. Pơmai H'Duyệt Niê, oei tơ̆ phương Tân Lập, pơlei tơm Buôn Ma Thuột, dêh char Đăk Lăk ăn tơbăt: “Pơdơh he adoi 'meh asong ăn kon hơ-ioh chă pơchơt, grăng pran, đei lơ buăl chă pơhrăm hơlen lơ tơdrong. Kon inh dang ei oei akŏm pơhrăm lăm hơsuang Dance-kids, pơhrăm hơsuang đơ̆ng sơnăm sơ̆ truh dang ei, sư adoi lăp hơsuang noh inh pơtoi asong ăn sư pơhrăm hơsuang”.

Tơ̆ Hnam hơkŭm joh ayŏ ăn đe hơ-ioh Đăk Lăk, đei hloh 2.000 'nu hơ-ioh tŏk bŏk oei pơhrăm hơsuang, hơri, bieh um, pơma chơng tơdrong sô̆, tơplŏng kơdou, pơhrăm bioh... Mă kăl, tơdrong akŏm  “Năr pơhrăm lơ̆m hơnih linh” tơgŭm kơhrĕng hơ-ioh đơ̆ng 8 truh 15 sơnăm chă hŏk hơlen tơdrong pơkăp kih luơ̆t, ưh đei tivi, ưh đei điê̆n thuăi. Pơmai Nguyễn Thị Thúy Hiền, Phŏ Hnam hơkŭm joh ayŏ ăn đe hơ-ioh Đăk Lăk tơroi: “Pơdơh he jĭ pơyan mă hnam hơkŭm joh ayŏ hơ-ioh pơm jang hăt hot. Hloh 30 lăm pơhrăm đei pơtơm đơ̆ng 5 jơ minh puơ̆t kơsơ̆ truh 9 jơ kơmăng, trŏ hăm lơ hŏk tro đơ̆ng 2 sơnăm tŏk tơ̆ kơpal. Sơnăm ou, 'nguaih kơ pơtoi dôm lăm hŏk hơnơ̆ng nhen dôm sơnăm hơdrol ki gah pơhrăm joh ayŏ, tơplŏng kơdou, pơhrăm gah tơdrong hlôh vao hơrih oei xa noh nhôn oei pơtơm lăm hŏk ưh huach jên, đei cham hŏk hơlen gah kơ̆l 'ngok hơgei, pơhrăm gah tang găn păng tơjră glơ̆k tơ̆ đak păng tang găn rơka hơbur ăn đe hơ-ioh”.

Tơ̆ dôm pơlei pơla, đe hơ-ioh Đăk Lăk tŏk bŏk oei mơ̆t lơ̆m khei pơdơh he 'lơ̆ng hơ-iă. Oh H'Juliê Byă, 9 sơnăm, oei tơ̆ xah Ea Tul, apŭng Cư Mgar tơroi, khei pơdơh he jing 'măng vă akŏm pơhrăm dôm tơdrong lăp. Ưh đei năm hŏk tơ̆ hnam trưng noh oh đei lơ jơ năr vă pơhrăm dơ̆ng dôm môn kăp gĭt păng chă pơchơt pơhiơ̆: “Lơ̆m khei pơdơh he, mon pơhrăm nơ̆r Anh, Toan, pơhrăm MC, pơhrăm chih, pơhrăm teh Piano. Noh jing dôm tơdrong mă mon lăp. 'Nguaih kơ 'noh ah jơ rơvơn, mon đŏk hơlen tơdrong hơ-'mon păng pơsuh hăm oh mon păng hăm đe buăl lơ̆m tơring mon oei xa”.

Lơ̆m khei pơdơh he adoi jĭ khei năr pơgơ̆r Khei pơm jang kơyuơ đe hơ-ioh, kơyuơ noh, dôm tơdrong jang vei lăng păng pơtho pơhrăm đe hơ-ioh roi đei tơrĕk hloh. Sơnăm ou hăm hơnăn “Asong khul jang vă keh đang dôm tơchơ̆t kơyuơ đe hơ-ioh”, đơ̆ng hơnê̆ khei 5, Anih jang vei lăng kon pơlei dêh char Đăk Lăk hlôi tơbang tơdrong pơtơm jang Khei pơm jang kơyuơ đe hơ-ioh. Lơ̆m khei 6, Đăk Lăk pơtơm “pơyan pơdơh he kơyuơ đe hơ-ioh” hăm dôm tơdrong tơroi pơtho păng pơhrăm glơi, tang găn păng tơjră glơ̆k tơ̆ đak ăn đe hơ-ioh lơ̆m jơ̆p dêh char. Tơ̆ rim tơring kon pơlei, khul đoan hơdruh tơdăm adoi pơgơ̆r akŏm khei pơdơh he ăn đe hơ-ioh tơ̆ hơnih oei xa hăm lơ tơdrong pơchơt 'lơ̆ng. Pơmai Phan Thị Trinh, Phŏ ƀĭ thư Hơnih jang đoan dêh char Đăk Lăk ăn tơbăt: “Hơtŏk tơdrong jang hơdoi hăm rim hơnih jang vă pơm jang hơdah păng sek tơlang dôm tơdrong đei ƀôh truh đe hơ-ioh. Hơtŏk tơdrong jang tang găn dôm tơdrong ưh kơ 'lơ̆ng tơ̆ tơring vă đe hơ-ioh gơh đei dôm tơdrong pơchơt sô̆ sơđơ̆ng 'lơ̆ng lơ̆m khei pơdơh he. Pơtoi tơlĕch hơvơn pơm jang Kơyuơ đe hơ-ioh 'mêm kơ-eng, akŏm lơ̆m dôm tơdrong gah pơjao jên hŏk dah mă pơjing ming man hơnih pơsuh pơchơt ăn đe hơ-ioh, mă kăl noh tơ̆ dôm tơring hơtaih yaih, păng dôm tơring tơnap tap”.

Hăm tơdrong atŭm jơhngơ̆m đơ̆ng rim jăl jang, rim hơnih jang, păng kơdih đơ̆ng mĕ ƀă, đe hơ-ioh Đăk Lăk tŏk bŏk đei minh pơyan pơdơh he tơpă sô̆ hơ-iă sơđơ̆ng păng kăp gĭt. Rim tơdrong jang, rim cham pơhiơ̆ ưh hơdrô̆ jĭ tơdrong sô̆, mă oei jing hơyak vă đe hơ-ioh lui ngeh, tih vơ̆ hloh đơ̆ng rŏng kơ rim 'măng pơdơh he.