Gia Lai chơt hơiă mât lơ̆m pơyan phĕ sầu riêng 2025
Thứ sáu, 14:33, 20/06/2025
VOV Tây Nguyên/Dơ̆ng tơblơ̆
VOV Tây Nguyên/Dơ̆ng tơblơ̆
VOV4.Bahnar – Kon pơlei jang chŭn mir Gia Lai pơtơm mât lơ̆m pơyan phĕ sầu riêng 2025. Mă đơ̆ng lơ tơdrong tơroi ƀơm truh tơdrong pơmat tat mưh tĕch tơ̆ teh đak đe, mă lei gơnơm jang đei plei ‘lơ̆ng, dôm bơngai pơtăm ‘long âu tơ̆ Gia Lai oei tĕch plei hăm kơjă đơ̆ng 55 rơbâu truh 70 rơbâu hlak 1 kĭ, mơ̆ng kiơ̆ plei ‘lơ̆ng thoi yơ, ‘nâu jĭ tơdrong tôch hơiă nhen vă roi tơbăt ăn 1 pơyan phĕ sầu riêng đei jơnei ‘lơ̆ng.
Hrei ‘nâu, lơ̆m dêh char Gia Lai đei dang 8.200ha sầu riêng, akŏm tơ̆ dôm apŭng nhen Ia Grai, Chư Sê, Chư Pưh, Đak Đoa, Mang Yang, Chư Prông, Đức Cơ… Plei jô̆ păh lăp đei 14,8 tấn/ha, păng hăm dôm pơgar ‘long đei vei rong ‘lơ̆ng, kơsô̆ âu iŏk đei đơ̆ng 20 truh 30 tấn/ha. Lơ̆m noh, dang 5.000ha oei đei plei, pơhlom năng lơ̆m dêh char gô phĕ đei 75.000 tấn.
Mă loi, Gia Lai hlôi ƀơk 54 mã số tơring pơtăm hăm teh xă truh 1.281 ha, tơgŭm ăn sầu riêng tơ̆ tơring gơ̆h tĕch tơ̆ lơ teh đak nhen Trung Quốc, Mi, New Zealand păng Úc. Truh sơnăm 2030, dêh char vă pơih xă teh pơtăm sầu riêng truh 10.000 ha, adrin pơjing mã số tơring pơtăm ăn 10 ha păng jang kiơ̆ tơdrong hơgăt GlobalGAP vă pơm lăp hăm tơdrong tĕch mơdro tơ̆ teh đak đe.
Viết bình luận