Pơma đam sơkơ̆t hơdah, Lâm Đồng jĭ dêh char chĕp kơ̆l gah choh jang xa kiơ̆ trong jang 'nao kơ jơ̆p teh đak, hăm lơ tơmam drăm đei hơnăn pơkăp tơmam choh pơtăm đei hơnăn pơkăp lơ̆m teh đak păng lơ̆m apŭng plenh teh. Atŭm hăm noh, tơdrong jang tơmang pơhiơ̆ hlôi jing tơdrong jang mŭk drăm dơnơm kơ tơring.

Lơ nơ̆r tơgop lơ̆m pơma đam hlôi tơblang hơdah dôm tơdrong đei ƀôh gah choh jang xa kiơ̆ trong jang 'nao tơguăt hăm tơmang pơhiơ̆ pơlei pơla; mŭk drăm sơđơ̆ng đơ̆ng rŏng kơ tơmơ̆t hơdai dêh char; jang kiơ̆ trong jang kơmăi kơmŏk 'nao, tơplih kơmăi kơsô̆, păng AI lơ̆m hơtŏk jang mŭk drăm jơk; hơmet 'lơ̆ng rơm rĕk đơ̆ng choh jang xa gơh rơgoh 'lơ̆ng... Kiơ̆ PGS.TS Ngô Thị Thu Trang, Đăi hŏk Kuôk gia Hà Nội, tơdrong tơmơ̆t hơdai 3 dêh char Lâm Đồng – Đắk Nông – Bình Thuận jing dêh char Lâm Đồng 'nao, hlôi pơm trong hiôk vă hơtŏk mŭk drăm jơk kơjăp sơđơ̆ng.