Tơdrong tơplih ‘nao đon tơchĕng vei lăng kơjăp tơmam choh jang sa đơ̆ng blŭng păng hơtŏk loi dơ̆ng tơdrong jang hơdai lơ̆m trong jang kơjăp đei lăng ‘noh jĭ trong jang gĭt kăl vă hơmet pơ ‘lơ̆ng pơmat tat păng yak truh tơdrong hơtŏk tơiung kơjăp đơ̆ng anih jang sầu riêng - mĭnh tơdrong tĕch tơ̆ teh đak đe (kơ ti đô lar”. ‘Nâu jĭ nơ̆r tơgop đei dôm bơngai tang măt tơlĕch ăn tơ̆ hop akŏm trực tuyến pơgơ̆r ‘năr 10/6 tơ̆ Hà Nội, hăm tơdrong vang akŏm đơ̆ng bơngai tang măt dôm anih tơm, anih jang, Khŭl jang ‘Nhot, plei Việt Nam, dôm bơngai joăt jang choh jang sa, bơngai mơdro sa tĕch tơ̆ teh đak đe păng dôm bơngai jang pơgar pơtăm sầu riêng tơ̆ dôm hơnih pơdăh tivi tơ̆ Cần Thơ, Đắk Lắk păng Tiền Giang.

Dôm bơngai tang măt pơma hơdăh sầu riêng hlôi jing 1 lơ̆m dôm tơmam tơm dơnơm, tơgop tih lơ̆m jên tĕch plei ‘long tơ̆ teh đak đe kơ Việt Nam. Mă lei, hơdai hăm tơdrong hiôk tih kŭm oei đei ưh kơ tŏ sĕt long nol. Athei tôch kơ hơlen đơ̆ng anih tĕch mơdro găh tơmam ‘lơ̆ng, tơchă băt anih pơm tơlĕch, hơnăn kơ sô̆ tơring pơtăm; tơdrong tơklep hơdai lơ̆m trong jang kơjă; tơdrong hơtŏk tơiung tơtŏ ưh kơ đei vei lăng; hơmơt kơ pơrang jĭ, tơplih tŏ ‘mi kial; păng tơdrong pơmơ̆ng lơ̆m 1,2 anih tĕch mơdro dơnơ̆ng ‘noh jĭ dôm tơdrong kăl kơ đei hơmet pơ ‘lơ̆ng tơtom. Kiơ̆ kơ dôm bơngai joăt jang, kăl kơ tơlĕch jang hloi dôm trong jang kăl, lơ̆m noh mă loi ‘noh jĭ pơma hơdăh truh tơdrong tơplih đon tơchĕng vei lăng. Tơdrong pơjing trong jang vei lăng kơjăp đơ̆ng mă blŭng truh tĕch tơlĕch gô jing tơdrong tơm vă iŏk dơ̆ng đon lui đơ̆ng bơngai răt yua păng pơm tơdrong ‘lơ̆ng ăn hơtŏk tơiung kơjăp đơ̆ng anih jang.