Sap apoăng hơnăm troh nôkố, Dak Lak tối ai 9 ngế tâ pơreăng COVID-19 a 5 tơring ƀă pơlê kong kơdrâm Buôn Ma Thuột. Tâi tâng nếo tro hâi râ to lâi. La ƀă hên tơdroăng tối ăm ‘nâi ki vêh tâ tú dêi COVID-19 a mâu tơring, kơvâ ngăn pơkeăng Dak Lak hiăng hnê mơhno mâu tíu pêi cheăng kơhnâ séa ngăn krâu tơdroăng tâ tú pơreăng.

Pôa Lê Phúc, Phŏ ngế pơkuâ Tíu xiâm séa ngăn pơreăng CDC Dak Lak ăm ‘nâi, tíu pêi cheăng hiăng tơrŭm ƀă Viện Vệ sinh Dịch tễ Tây Nguyên vâ ngăn tối ăm ‘nâi ki tơ’lêi tâ tú, tối ‘na tơdroăng ‘nâi ƀă tơbleăng mâu tơdroăng hbrâ mơdât ăm tơtro. Tơdrêng amê, Tíu xiâm séa ngăn xuân po hriâm pơtâp mơdêk hlê plĕng ăm mâu kăn ƀô̆ ngăn pơkeăng ‘na tơdroăng séa ngăn, vâ rĕng châ ‘nâi ki tâ COVID-19, tăng ngăn ƀă xôh pơkeăng a tíu tâ tú tro tiô tơdroăng pơkâ.

“Ngin ai tí tăng ‘nâi plĕng hnê mơhno ‘na tơdroăng cheăng xuân môi tiah tăng ‘nâi klêi mê tối ăm Tíu xiâm vâ hnê mơhno mâu tíu pêi cheăng hbrâ mơdât pơreăng, hngêi pơkeăng, malối ‘na hngêi pơkeăng mê kô pơkâ xo pơlât ƀă hbrâ rơnáu vâ ai tiô tơdroăng vâ mot pơlât drêng ai ngế tâp COVID-19. Mâu tíu pơlât  xuân hiăng hdró mâu kơpong klâ krê, mơ-eăm răk ngăn mơdât tâ tú tung hngêi pơkeăng. Mâu tíu hbrâ mơdât mơdêk séa ngăn mâu ngế ki tâ tú, xôh pơkeăng a tíu tâ tú tâng ai”.

Hbrâ ví ƀă pơreăng COVID-19, Khu xiâm ngăn pơkeăng kong pơlê Kon Tum tơrŭm ƀă mâu tíu pêi cheăng ki tơdjâk troh mơhnhôk pêi mâu tơdroăng hnê tối ăm kuăn pơlê thế pêi pro tro  hbrâ mơdât COVID-19. Séa ngăn, pro tơniăn krúa pế pơchên kế kâ, tơmeăm ‘na pơkeăng, trếo pơkeăng, mơngế ngăn pơkeăng pêi cheăng ai tiô pơkâ hbrâ mơdât pơreăng. Tơdrêng amê, kơvâ ngăn pơkeăng  kong pơlê Kon Tum xuân hbrâ séa ngăn krâu tơdroăng tâ tú pơreăng, mơdêk tơbleăng mâu tơdroăng hbrâ mơdât a hngêi pơkeăng, tung kuăn pơlê ƀă a bo cheăng tíu tê mơdró tơkăng kong Bờ Y. 

Tơrŭm krá ƀă Tíu xiâm séa ngăn mơdât pơreăng Tây Nguyên tối nhên tơdroăng ƀă tối ki tơ’lêi tâ tú vâ pâ thế, tơbleăng mâu tơdroăng hbrâ mơdât pơreăng ăm tơtro. Ƀok thái pơkeăng Đỗ Ngọc Hòa, Phŏ Pơkuâ khu xiâm ngăn pơkeăng kong pơlê Kon Tum, ăm ‘nâi:

“Ngin xuân pơkâ thế mâu tíu pêi cheăng, khu râ, kơvâ cheăng, tíu pêi cheăng râ kong pơlê, Vi ƀan kuăn pơlê mâu tơring, pơlê kong kơdrâm mơdêk tơdroăng cheăng hbrâ, mơdât pơreăng COVID-19 a mâu tíu ôm hyô, xah hêi, tíu tơkŭm pú hên. Pakĭng mê, mơdêk tơdroăng cheăng hnê tối ăm kuăn pơlê pêi pro mâu tơdroăng hbrâ mơdât pơreăng. Drêng tâ tơná hiăng tơngê, kơ o, pá kâi hiâm thế rĕng lăm khăm a hngêi pơkeăng ki achê má môi vâ châ ƀok thái pơkeăng khăm, ngăn ƀă teăm pơlât tơdrêng” .

Ƀă tơdroăng pâk vaccine COVID- 19, tiô Phŏ ngế pơkuâ xiâm ngăn pơkeăng kong pơlê Kon Tum tối, nôkố kơxô̆ mơngế ki pâk tŭm vaccine tung tâi tâng kuăn pơlê dêi kong pơlê dâng 83%. Ƀok thái pơkeăng Đỗ Ngọc Hòa hnê tối hdrối, tâng kuăn pơlê kal vâ pâk vaccine mơdât COVID-19, kô chiâng lăm troh a mâu hngêi pơkeăng  ki achê má môi vâ chêh inâi.

Ing mê, kơvâ ngăn pơkeăng kô tơkŭm kơxô̆ mơngế, pâ Viện Vệ sinh Dịch tễ Tây Nguyên ăm vaccine vâ pâk ăm kuăn pơlê. Sap apoăng hơnăm 2025 troh nôkố, lâp tung kong pơlê Kon Tum hâi ai ngế ki lâi tâ COVID-19.

Khu xiâm ngăn pơkeăng Lâm Đồng hiăng hnê mơhno mâu hngêi pơkeăng khăm, pơlât tung kong pơlê mơdêk hnoăng cheăng khăm, châ ‘nâi, pơlât mơngế tâ COVID-19. Tăng ngăn ƀă po ngăn pơkâ xo, pơlât mơngế tâ COVID-19 a tíu pêi cheăng tiô tối tơbleăng dêi pơreăng, ôh tá lôi ai tơdroăng kơdrâ ‘na hbrâ mơdât. Hbrâ hdrối mâu tơmeăm, tíu pơlât, kơpong klâ krê, tơmeăm pơlât, tơmeăm pơkeăng vâ tơkŭm xo, pơlât, klâ krê, khăm ngăn tối ăm ‘nâi pơreăng, pơlât ăm mơngế ku tâ tú, tơniăn ăm mơngế ki pơlât khu tơ’lêi tâ tú hên (mê cho vâi kơdrâi dé mơ-êa, mơngế tung châ ai tơdroăng châi pá pơlât prêi, tơdroăng châi ó, mâu hơnăm hiăng hên...) kơpong pơlât mơdêk ivá mo lĕm, châi plâi muih, châi kơ kố, pâ pơlât...

Pro kơtăng ‘na hbrâ mơdât pơreăng tâ tú, tơniăn tung tơdroăng tăng ngăn mơdât pơreăng, malối cho pơreăng tâ tú ing troăng hiâm, vâ kơdroh tâ tú tung hngêi pơkeăng khăm pơlât. Hnê kơhnâ mơgrúa pagong, tung veăng pơlât, xoăng veăng pơlât tơ’lêi  tơtro tung tơdroăng ai tâ tú pơreăng ƀă mơgrúa lĕm hyôh kong prâi đi đo krúa lĕm.

Khu xiâm ngăn pơkeăng pơlât Lâm Đồng hnê mơhno tíu xiâm Séa ngăn mơdât pơreăng kong pơlê pro xiâm mơdêk tăng ngăn, lăm séa ngăn tơdroăng pêi cheăng ‘na hbrâ mơdât pơreăng a mâu hngêi pơkeăng tung lâp kong pơlê. Séa ngăn, po ngăn tơdroăng pơkâ pêi, hbrâ rơnáu, tŭm mơngế, ai tŭm mâu tơmeăm vâ pơlât, pơkeăng, trếo pơkeăng xoh pơkeăng kơdê pơreăng, hbrâ pêi pro tro mâu tơdroăng drêng ai pơreăng tâ tú, pôi tơngôu, thế hbrâ rơnáu đi đo, hlối tơbleăng pêi tro mâu tơdroăng cheăng pêi rêm hâi.