Mâu tơmeăm pro ƀă tơnêi hneăn dêi mơngế Bơhnéa ôh ti hên, mâu túa rơneăm pro gá tơ’lêi, maluâ rơtế môi túa la ôh ai ki lâi bối ki lâi. Laga tơdroăng ki pro chiâng ki lĕm tơviah tơ’lêi hlo má môi cho mơngiơk prăng ki chí lĕm dêi rêm to tơmeăm. Ngoh Nazam Hasharim, tơmối ôm hyô Malaysia hâk vâ drêng châ mơnúa meăn pro ngăn tơmeăm ƀă tơnêi hneăn kố ăm ‘nâi: “Drêng ngăn, á ngăn môi tiah kế tơmeăm ton nah kơtăn kố lối hrĭng hơnăm. Ngăn gá mơnâ mâ lĕm, lĕm môi tiah nâ ki pro tơmeăm ƀă tơnêi hneăn kố há. Á ‘nân ối to lâi chôu la bu pro châ môi to ki kŭn kố xo. Kơdrâ khât drêng vâi bu xúa to lâi to kế ki tơ’lêi hlâu. Túa pro kố dêi vâi phá ƀă mâu ki klâi ki á ‘nâi”.

Xăng Y Khel a tơring Kon Braih, kong pơlê Kon Tum ăm ‘nâi cheăng pro tơmeăm ƀă tơnêi hneăn dêi mơngế Bơhnéa ôh ti ‘nâi ai sap ing rôh ki lâi. Mâu nôu, mâu nâ pêi cheăng kố tung rơnó tôu lơ rêm rôh ối xo xo. Pro tơmeăm ƀă tơnêi hneăn ôh ti pá khât la kal tơdroăng pro lĕm, krâu, kơhnâ ƀă hâi chôu mê gá tro ƀă vâi kơdrâi.

Kế ki pro tơmeăm cho tơnêi hneăn, tơnêi athế châ xo a kơpong têa plông Đăk T’Băng Giô xua tơnêi akố ai ki peâk rơmuăn gá lĕm. Hdrối vâ xo tơnêi, vâi hmâ rơkâu xối cho môi pŭm í ƀă môi xiâm drôu. Mơheăm í ƀă drôu châ xế tâ tá kơpong tơnêi hiăng xo vâ xối pâ xeăng Prao. Klêi xo, mê tơnêi ki hiăng têng khăng, pêi liê mê nếo um xo ki liê môi tiah tơpoăng. Klêi mê, tơnêi châ tâ tung môi to kế ki dâ hná loăng, ok têa hơ’lâk, pâm, têa ăm gá rơmuăn ƀă hiăng tơkâ dêi rơpó.

Tung pơla meăn pro tơmeăm gá bô bối dêi rơpó, pro châ gá hdrối mê troh rơkong ƀă ki mơ’nui cho kơdró gá. Ki lĕm tơviah tung cheăng meăn pro tơmeăm kố dêi mơngế Bơhnéa mê vâi bu xúa to lâi to kế tơmeăm ki tơ’lêi hlâu tê cho klŏng kơlá, ché, kơleăm xut ki kŭn, to lâi to hlá, to lâi pŭm hmốu.

Ôh ti ‘nâi troh kih thuât kế ki tâ tá, teăng amê vâi kơdrâi Bơhnéa xúa môi to loăng lơ póu pêi báu kơduôp. Vâ pro châ vó, vâi prôk lăm prôk vêh, tâ tá tiô túa tơrôu dêi trum ki mơhno chôu. Môi pâ kŏng râng pa kong, kŏng ki tá pong tung dế tơnêi ăm ga tro drêng hiăng hông. Pro rơkong vó mê tiô trŭm hiăng hdró. Hmâ ngế ki pro xo ché kơchoh xut choâ ‘lâng ăm châ vó ai têa.

Ngâ vó hiăng pro klêi, ví djâ têng 1 hâi mê nếo djâ vâ pro krí vó. Drêng mê vâi ‘nân pro dêi chêng tơdrăng ‘măn vó a plâu mê kơdât krí vó vâ pro tiah lâi ăm gá ai um, vâ krí pôi tá tro hông. Xăng Y Khel ăm ‘nâi, túa pro vâ chiâng vó cho ton má môi athế ai tơkŭm tâi ivá, ki rơmuăn lĕm dêi kơpeăng kŏng, túa hvêa prôk dêi chêng, tơdroăng tơmâng ngăn nhên dêi mâ.

“Drêng hiăng meăn klêi, rơnêu klêi, têng 3 hâi ăm gá khăng, têng a tíu ki ai xâp rơngiâp, xo môi pŭm hmối tơvó uâ ăm gá lĕm mê lăm pheăng a on mê nếo prâu pôh”.

Nôkố, mơngế Bơhnéa xuân ối rak túa prâu pôh vó, kơ’lo tung on a kong, a tíu ki ôh ti ai khía châ pêi, ‘măn hdréa tâ tá mâu vó, kơ’lo mŏng tung dế, pa kong ƀă a pêng. Mâu vó, kơ’lo, mŏng dêi mơngế Bơhnéa kơvâ Jơlâng túa gá ôh lĕm phá krê xêh. Nâ Thanh Ngọc, kăn ƀô̆ cheăng tung tíu ‘măn rak tơmeăm, hlá mơ-éa kong pơlê Kon Tum ăm ‘nâi:

“Mâu vó, kơ’lo, hdro mŏng akố vâi lôi tiah mê, ôh tá rơneăm pro lĕm. Malối, mơngế Bơhnéa pro mơngiơk ƀă kơtôu loăng khĕn cho Tnung. Tung pơla prâu, pôh hiăng vâ chên, vâi xo mê tâ kơtôu loăng Tnung ki hiăng pâm liê, kơdrăm tung têa pâm, pro dâng 3,4 xôh môi tiah mê. Pro tiah mê vâ vó ai mơngiơk prăng lĕm ƀă krá kâk”.

Vâ pro klêi mâu vó, kơ’lo, hdro, mŏng lĕm pơrá ai tơdroăng ki veăng pro dêi hên tơdroăng môi tiah: kong prâi, tíu pro, ki tôu hngíu, hâi chôu, hên ivá. Tâi tâng mâu tơdroăng mê bu ai to tơdroăng ki pro lĕm rơkê, tơdroăng pro rơkê chal krâ dêi ngế ki pro nếo chiâng. Xăng Y Khel tối, maluâ nôkố mâu kế tơmeăm xúa hiăng châ roê hên a kơchơ la tung rơpŏng mơngế Bơhnéa Jơlâng xuân athế ai iâ hlái to lâi to vó, hdro, mŏng pro ƀă tơnêi hneăn:

“Mâu hdro, mâu kế ki pin roê hlâu mê pế gá ôh ti kơhiâm môi tiah ƀă mâu kế ki pin pro. Pế hmê kơhiâm. Hngêi ki lâi xuân ai môi troh péa to lơ pái to môi tiah kố. Tâng ôh ti pế hmê mê pế tơxông gá rơmuăn. Lơ xúa ‘măn pló pế drôu, tâ po, tâ mâu kế ki chiâng tâ. Tiô khôi túa tơlá kế pro ƀă tơnêi hneăn kố ôh tá la lâi chiâng lôi”.

Maluâ tiah mê, tơdroăng ki mâu ngế môi tiah xăng Y Khel tôu tuăn nôkố cho vâi kơdrâi rơxông ối nếo Bơhnéa vâi ôh ti hâk vâ ƀă cheăng pro tơmeăm ƀă tơnêi hneăn xếo.

Rak túa ki ton nah vâ hâk vâ tơdroăng rêh ối nôkố, hlê ‘na xiâm kối vâ ‘nâi nhuô̆m ƀă hâk tơngăm ivá cheăng tơmiât pêi rơkê, tơdroăng ki rơkê dêi mơngế Bơhnéa nah cho tơdroăng pêi ki kal. Vâ rak vế ki lĕm kố, tuăn mơno hlê plĕng hnê cheăng ăm pơlê pơla mơngế Bơhnéa nếo cho tơdroăng ki rak vế nhên khât.