Troh nôkố kong pơlê Kon Tum hiăng pê klêi tâi tâng tơdroăng hbrâ ăm rôh tơ’noăng mơgêi hriâm râ má pái phôh thong châ tơkŭm po hâi lơ 25-27/6 kô ah. Hneăng tơ’noăng mơgêi hriâm râ má pái phôh thong hơnăm kố kong pơlê Kon Tum ai lối 5.300 ngế hok tro tơ’noăng. Lâp tung kong pơlê xoăng 14 tíu tơ’noăng ƀă 244 veăng tơ’noăng ƀă 28 veăng tơkôm.

Pakĭng mê, kơvâ ngăn Hnê hriâm ƀă hnê mơjiâng tuăn ngôa rơkê ƀă mâu kăn dêi mâu cheăm, tơring, kong pơlê xuân hiăng xoăng tơ’nôm 9 tíu tơ’noăng ki hbrâ vâ tơkŭm po tơ’noăng tâng lơ ai tơdroăng xía vâ xua kong prâi pro ôh tá tơniăn. Vâ tơniăn hneăng hơ’noăng mơgêi hriâm râ má pái phôh thong kơtăng tá ai tơdroăng klâi, pêi pro tro luât pơkâ, kong pơlê Kon Tum mơhnhôk lối 1.200 ngế kăn ƀô̆, kŏng chưk, viên chưk pêi cheăng veăng ‘na ngăn a tíu tơ’noăng. Tung mê, ai kăn ƀô̆ ki ngăn tơ’noăng vâ chê 630 ngế.

Jâ Y Ngọc, Phŏ kăn hnê ngăn Vi ƀan kuăn pơlê kong pơlê, Ngế pơkuâ Khu hnê mơhno Hneăng tơ’noăng mơgêi hriâm râ má pái phôh thông  hơnăm 2025 dêi kong pơlê Kon Tum, ăm ‘nâi: Khu hnê mơhno kô krâ ƀă pơkâ hnoăng cheăng nhên ăm tơrêm ngế kăn ƀô̆ tâng lơ ai tơdroăng xôi tung pơla pêi hnoăng cheăng a hneăng tơ’noăng.