A chê pái hơlâ troăng mơ’nui buôn Trum, cheăm Tâm Thắng, tơring Cư Jút, cho hngêi nếo mơjiâng pro lĕm rơdâ 90m2  dêi pôa Y Tem Kpơr. Tung kơdrum hngêi, mâu troăng loăng kơphế ngiêt dế kơ’mŭn plâi. Pôa Y Tem hơ’muăn rơpŏng hngêi pôa cho rơkŏng kơtiê xơpá má môi dêi pơlê, ai 7 ngế kâ, pê lo liăn ki hên kơnôm to a kơphế ƀă hnoăng lăm pêi cheăng vâi, hâi ai hâi oh. Kơnôm tơdroăng Pơkâ dêi tơnêi têa ‘na kơdroh kơklêa xăm kơtiê. Kơxô̆ liăn pê lo ƀă tơdroăng rêh ối dêi rơpŏng hngêi pơ’lêh tơrêm hâi. Sap apoăng hơnăm 2022 troh nôkố, rơpŏng hngêi pôa klêi păn pơcháu ro hdrê, kơjo kum pơtối ‘mâi pêt kơphế, ƀă ki achê kố cho mơjiâng pro hngêi. Tâi tâng hiăng chiâng tơdroăng ki mơ-eăm vâ rơpŏng hngêi pôa Y Tem mơnhông tơƀrê:

“Hdrối vâ ai tơnêi têa veăng gum, tơdroăng rêh ối dêi ngin pá puât, hngêi cho hngêi pơtân pro ƀă loăng kuâ lêm tôl ki hiăng ton nah. Nôkố hiăng hlŭn kơtiê, hngêi a châ kơjo kum ăm păn môi tro ro hdrê 20 rơtuh liăn ƀă 70 rơtuh liăn mơjiâng pro hngêi, nôkố ôh pá  xâu xếo troh kong mêi khía, tơdroăng rêh ối hiăng tơniăn. Nôkố a păn ro ăm ro dêi nhâ phâi vâ rĕng kân piê lĕm pơtối ai kuăn nếo ƀă hlối rak ngăn kơdrum kơphế, nôkố rơpŏng hngêi  hiăng hlŭm kơtiê. A mơnê hên kơ Đảng ƀă Tơnêi têa”.

Kơtăn buôn Trum ôh tá hơngế, buôn Ea Pô xuân dế pơ’lêh tơrêm hâi kơnôm luât tŏng gum kơdroh kơklêa xăm kơtiê. Jâ H’Buan Kbuôr, kuăn ngo Rơđế, ing rơpŏng kơtiê má môi dêi pơlê, kơnôm kơjo kum  ăm păn ro hdrê ƀă 70 rơtuh liăn mơjiâng pro hngêi, ing tơdroăng mơ-eăm dêi rơpŏng hngêi, jâ hiăng ai hngêi ối lĕm tơtô, cheăng kâ tơniăn. Toăng hngêi nếo pro klêi, ro xuân hiăng  xiu, ƀă tơdroăng pêi pro vâ hlŭn kơtiê pơxiâm ing luât pơkâ kơtăn dêi Đảng, Tơnêi têa. Jâ H’Buan phiu ro ăm ‘nâi:

“Hngêi a ai 4 sao tơnêi ƀă mung pêi ki vâi 2 sao nếo  chiâng 6 sao, xua tơmeăm pêt ôh tá dâi lĕm ôh tá châ hên a bú châ xo 40 rơtuh liăn. Hdrối nah rơpŏng hngêi xơpá la châ tơnêi têa kum pro ăm hngêi ối, nôkố tơdroăng rêh ối tơniăn. A mơnê hên”.

Tâm Thắng cho cheăm pêi chiâk, kơtăn xiâm kong pơlê Dak Nông dâng 110 km, mê ai 15 thôn, pơlê ƀă 1/3 pơ’leăng mâ mơngế cho kuăn ngo. Pôa Trần Thế Quang - Kăn hnê ngăn Đảng ủy cheăm ăm ‘nâi, pơla hơnăm 2021- 2025, cheăm châ xoăng vâ chê 3 rơtal liăn ing tơdroăng kơdroh kơklêa xăm kơtiê  kum ăm tro mơngế ki  kơtiê ‘na hngêi ối, kum hdrê kuăn kiâ ăm kuăn pơlê vâ păn, kum hdrê pêt, phon rơvât. Kơnôm ing mê, kơxô̆ rơpŏng chu kơdroh ing 5,3% chu ối 1,9%, veăng kum cheăm mơjiâng thôn pơlê nếo hơnăm 2024 ƀă chiâng tíu ki pêi tơƀrê kơdroh kơklêa a kơpong hơngế tung kong pơlê. Pôa Trần Thế Quang tối mâu tơdroăng cheăng pêi drêng tơdah xo liăn vâ pêi tơdroăng xăm kơtiê ing Tíu xiâm tơnêi têa ăm kong pơlê:

“Tung tơbleăng, ngin đi đo mơdêk hnoăng cheăng dêi kuăn pơlê ƀă ing tơdroăng tơmâng khât dêi kuăn pơlê châ xúa tơdroăng tŏng gum. Ing mê, klêi kuăn pơlê tơdah xo liăn kơjo kum dêi Tơnêi têa, pêi cheăng tro tơdroăng, pơtối pêi ai pơxúa. Pakĭng mê, ngin xuân xoăng hnoăng cheăng séa ngăn dêi Mặt trâ̆n ƀă khu grup vâ tơniăn tơdroăng tơbleăng pơkâ  pêi ôh tá tro lup, oh tá mơ’nhiê, thế hlo ki pêi châ tơƀrê”.

Tơdroăng Pơkâ dêi tơnêi têa mơnhông cheăng kâ-rêh ối kơpong kuăn ngo ƀă kong ngo, pơla hơnăm 2021-2025, châ tơbleăng a tơring Cư Jut, hiăng  hlo hên ki pơ’lêh. Hrĭng rơpŏng kuăn ngo châ kơjo kum teăm tơdrêng ‘na tơnêi ối, tơnêi pê kâ, têa krúa, hngếi hngêi ối, cheăng pêi... Ƀă vâ chê 40 rơtal liăn xo ing hngêi rak liăn tơnêi kum, Cư Jut cho tơring pêi cheăng châ tơƀrê má môi, veăng pro ăm hên cheăm châ mơjiâng thôn pơlê nếo. Tiô pôa Trần Mai Việt- Phŏ ngế pơkuâ kuăn Ngo ƀă loi tĭng tiô khôp tơring Cư Jut, tơdroăng pơkâ dêi tơnêi têa xăm kơtiê kô thăm pơtối rak vế  ki tơƀrê tâ nếo drêng mâu kăn kong pơlê péa râ pêi cheăng khât. Râ cheăm kố rak ngăn, xoăng  hnoăng cheăng, ví xoăng pro hên tíu,  pro mơdon:  

“Hdrối nah ai troh 10 tơdroăng tơkêa bro xoăng ăm hên tíu pêi cheăng tơbleăng, tơ’lêi  pro hên tíu, pá xéa ngăn ƀă ôh tá châ pro tơdrêng tơ’mô. La ngiâ kố pơcháu ăm môi khu ki rak ngăn kô hlâu tâ tung pêi pro. Malối, thế pơcháu tơdrêng ăm râ cheăm tơbleăng pêi, vâ kuăn pơlê ki châ xúa tơdrêng, ví pêi tơvâ tơvân môi tiah hdrối nah, hlối tơ’lêi tơmâng xo, hlối pơtối pêi tơbrê nhên tâ”. 

Ki khât ăm hlo,  tơdroăng Pơkâ dêi tơnêi têa mơnhông cheăng kâ  - pơlê pơla kơpong kuăn ngo ƀă kong ngo a tơring Cư Jut hiăng ƀă dé ai pơxúa  ‘nâi kơdĭng, tơdjâk  trâu rơdâ troh kuăn pơlê kuăn ngo ki ối xơpá. Kố cho troăng hơlâ ai pơxúa khât, tơtro, veăng ‘no hnoăng kal tung mơnhông cheăng kâ- rêh ối ƀă  kơdroh kơklêa xăm kơtiê a Dak Nông. Drêng Khu kăn kong pơlê péa râ hiăng mơjiâng klêi, tơdroăng tơbleăng pêi kal châ tơmâng khât tâ vâ pêi cheăng tơƀrê khât tiô pâ thế ing cheăm kong pơlê.