Măng tĭng hdrối, Khu ngăn Khoa hok ƀă Kong ngê̆ kong pơlê Dak Lak tơrŭm ƀă Khu ngăn Khoa hok ƀă Kong ngê̆ kong pơlê Phú Yên ƀă Viễn thông 2 to kong pơlê tơkŭm po hriâm xúa Troăng xúa tơdjuôm ăm kăn ƀô̆, kong chưk, viên chưk râ cheăm a Dak Lak ƀă Phú Yên. Tơdroăng hriâm kố tơkŭm po ‘na hnê xúa 2 to troăng, mê cho: Troăng pơtroh tơdroăng kal ‘na pơkâ tơleăng mơ-éa kong pơlê Dak Lak ƀă Troăng Pơkuâ ngăn mơéa ƀă Tơdroăng pơkuâ.

Pôa Nguyễn Văn Thản, phŏ kăn pơkuâ Viễn thông Dak Lak, tíu pêi cheăng Vi ƀan hnê ngăn kong pơlê Dak Lak pơcháu tơbleăng mâu kong ngê̆ thong tin vâ xúa tung tơdroăng ki ‘mot tơkŭm 2 to kong pơlê Dak Lak ƀă Phú Yên, ăm ‘nâi, lối 1.000 tíu pơtroh mơ’no a 102 to cheăm, bêng ƀă lối rơpâu ngế kăn ƀô̆, kong chưk, viên chưk dêi 2 to kong pơlê veăng hriâm. Kố cho mâu ngế ki xiâm veăng hriâm tơdah xo ƀă pơkâ tơleăng mâu mơ-éa dêi kong pơlê Dak Lak nếo.

“Mâu khu kăn ƀô̆ kong chưk 5 troh 7 ngế ‘nân a veăng pêi cheăng vâi chiâng vâ veăng tơdrêng hlối. Tơdrêng amê hlối tơkŭm po a mâu hô̆i trường dêi mâu cheăm ki nếo mơjiâng, pro tơ’lêi hlâu khât ăm kăn ƀô̆, kong chưk veăng hriâm. Ngin tơtrŏng ‘na tơdroăng ki râng kŏng mơhno tơdroăng cheăng, hnê ăm rêm tơdroăng ki po, pro ăm mâu kăn ƀô̆, kong chưk a 34 to cheăm, bêng ki nếo dêi Phú Yên vâ vâi vâi rĕng ‘nâi tâ, tơ’lêi tâ drêng trâm mâu tơdroăng tung pơla pêi cheăng vâ vâi pêi tơ’lêi hlâu drêng tơdah xo mâu hồ sơ dêi kuăn pơlê”.

Hdrối mê, Khu pơkuâ hnê ngăn Đảng Dak Lak hiăng tơbleăng mâu inâi kăn pơkuâ xiâm a mâu cheăm, bêng ki nếo. Kong pơlê xuân mơjiâng pro 6 to tôh pêi cheăng hnê mơhno, séa ngăn pơkâ ƀă pơkuâ a hneăng hôp Đảng pơla hơnăm 2025 - 2030 a mâu tíu pêi cheăng nếo.

A Rôh hôp pơkâ kơtăng tơdroăng cheăng dêi Đảng ủi, khu kăn pơkuâ ƀă mâu khu cheăng kal kí rêh ối pơlê pơla râ cheăm nếo, pôa Nguyễn Tuấn Hà, phŏ kăn hnê ngăn Vi ƀan kong pơlê Dak Lak, pơchân.

“Mâu kăn hiăng pro kăn pơkuâ Vi ƀan hnê ngăn kuăn pơlê mâu tơring mê hiăng rơkê, la ki rơkê mê pin ôh tá chiâng xúa tâi tâng drêng pin pro kăn hnê ngăn ăm cheăm ki nếo, gá phá khât, hdrối nah klâ xoăng râ xoăng hnoăng ai to lâi ôh, nôkố lối 1 rơpâu hnoăng cheăng mê tuăn tơmiât athế pơhlêh. Mâu kăn a kơ koan ki ê lơ a râ kong pơlê ƀă pro kăn hnê ngăn cheăm mê athế tơtrŏng tơdroăng kố, mê pin pôi tá tơngôu mê ah gá kô xơpá tung pơla pin pơkâ tơleăng ƀă chiu pôu râng dêi hnoăng”.

Tiô túa Pơkâ, tung 2 hâi lơ 25 ƀă 26/6, mâu tíu pêi cheăng râ cheăm, bêng ki nếo a Dak Lak hiăng tơkŭm pêi mơnúa ngăn. Hdrối mê, mâu bêng hiăng hbrâ rơnáu mâu tơmeăm xúa, pêi pro klêi tơmeăm, tíu pêi cheăng điê̆n tưh ƀă túa pơkâ tơdah kuăn pơlê, pơkâ tơleăng mâu kơthô pơtroh pơsăm tối, pơsăm tơkêng.

Pôa Nguyễn Đình Trung, Kăn pơkuâ hnê ngăn Đảng Dak Lak, tối nhên: rôh pơkâ xúa mơnúa ngăn rôh kố vâ mơnhên tối tâi tâng ivá cheăng dêi mâu ngế pêi cheăng, pơkuâ ƀă tơleăng mâu tơdroăng ki ai khât dêi kăn ƀô̆ tung kơ koan pêi cheăng nếo. Ing mê, teăm châ hlo mâu tơdroăng ki xơpá, tơvâ vâ ai túa pơkâ ‘mâi rơnêu hdrối vâ păng ‘nâng pêi cheăng.

“Pin tối cho pêi mơnúa pêi ngăn, la ki xiâm vâ tơbleăng pêi gá cho khât. Kố cho hvêa prôk ki hbrâ rơnáu vâ drêng hâi lơ 1/7 pin xúa păng ‘nâng gá pôi tá kơdrâ. Tơdroăng cheăng gá ôh ti kôm kơbố, tâng mâu kăn pơkuâ xiâm ôh tá tơbleăng pêi mê râ pá xôp kô tơkôm tơdroăng cheăng tiah mê kơ koan cheăng tơnêi têa kô tro pơto pro mơdon. Xua mê, pó pêi cheăng ki lâi athế hbrâ rơnáu ƀă mơnúa pêi ngăn ăm dêi tơná ƀă Kăn pơkuâ ngăn Đảng dêi cheăm bêng nếo kô chiu pôu râng dêi hnoăng ‘na pơkâ xúa pêi dêi khu xiâm tơdroăng kal kí a tíu ki mê”.