Tung mê, pro nếo cho 2.220 toăng ƀă ‘mêng 520 toăng hngêi ki ton, gum kuăn pơlê tơniăn tung rêh ối, pêi cheăng. Tung pơla têa tah, Kon Tum hiăng mơhnhôk thế veăng tơlo vâ chê 200 rơtal liăn, tung mê kơxô̆ liăn mơhnhôk ing pơlê pơla châ lối 102 rơtal, Khu xiâm ngăn Kŏng an gum 84 rơtal ƀă kuăn pơlê veăng gum vâ chê 50 rơtal rơtế ƀă lối 180.000 hâi pêi cheăng pro.

Kăn pơkuâ rêm râ tung kong pơlê ai hên troăng hơlâ ‘mâi mơnhông xơpá ƀă hiâm mơno “Kơbố ki lâi ai klâi gum ki mê, kơbố ki lâi ai hnoăng gum hnoăng, ai liăn ngân gum liăn ngân, ai iâ gum iâ, ai hên gum hên”. Rôh kố, Vi ƀan hnê ngăn kong pơlê Kon Tum diâp Ƀâng khĕn kơdeăn ăm 21 khu pú hên ƀă 32 ngế krê ki kơhnâ rơkê tung pêi pro tơdroăng tơ’noăng “Tơdjuôm ivá têa tah hngêi tơ’nhiê xi kơchoh”.