Hngêi pơkeăng Nhi đồng 1 (Pơlê kong kân Hồ Chí Minh) nếo kum môi ngế o kơdrâi 12 hơnăm (ối a kong pơlê Trà Vinh) tro kơdrâ pơkeăng tơngê lo mơheăm râ ó hlối lo mơheăm tung klêa, hmếo pơ ai khế oh tá tro hơnăm. Ƀok thái pơkeăng Phạm Văn Quang - Ngế pơkuâ Khoa Hồi sức tích cực hngêi pơlê Nhi đồng 1 ăm ‘nâi, Kố cho ngế tơngê lo mơheăm hía hên mơheăm ó, phá tâ ƀă mơngế ki kơdrâ xua tro rong râ tung klêa kliâm, gơgốu. Tâng hrá mot pơlât a hngêi pơkeăng mơni kô hlâ.

“Tơngê lo mơheăm ‘mêi tung troăng mơheăm xua mê muăn kơdrâi ai khế hên. Má péa nếo xúa hdrêng lo hên mơheăm troăng klêa mê ngin chiâng nội soi pơlât tơdrêng. Tơdroăng tơngê lo mơheăm tung lâp lu mê bú kal râng mơheăm a mâu tíu ki lo mơheăm hên, a mâu tíu ki ê xuân ối lo há mơheăm, mơ-eăm pâk pơkeăng vâ kum kâi râng mơheăm. Klêi mê, ngin tơpui tơno pơla mơngế rơkê ‘na tơdroăng pơreăng dêi Hngêi pơkeăng Ngăn ‘na mơheăm ƀă Pâk ‘mot mơheăm vâ pâk pơkeăng tiô túa nếo kum ăm mơheăm nếo”.

Hngêi pơkeăng Nhi Đồng pơlê kong kân xuân nếo tŏng kum pơlât teăm tơdrêng môi ngế o kơdrâi 5 khế tro kơdrâ lo mơheăm ki râ, ‘mêi pro tơkâ mơheăm ó. Hdrối mê, o kơdrâi tơngê hmân 3 hâi, khăm ngăn pơlât thĕn kŏng-chên-rơkong a hngêi pơkeăng krê dêi kuăn pơlê. Troh hâi má 4, mơhé hiăng kơdroh tơngê, o hmếo pơ koi đi đo, ngiâ péa ngiât, troăng mơheăm kơtâu chôa, lo hêa têa prâp, lo mơheăm ó. Kơnôm pơlât ƀă tơdroăng pâk têa sơrôm kơdroh kơdrâ, mâu tơdrong mơheăm pâk ‘mot ƀă ăm hiâm ƀă kơmăi, kơ’nâi 3 hâi, o hiăng luâ tơdroăng ki rơ-iô.

Ƀok thái pơkeăng Nguyễn Minh Triết, Phŏ pơkuâ Hngêi pơkeăng Nhi đồng pơlê kong kân ăm ‘nâi, Lo mơheăm tiah o mê cho vâ tơbleăng tối ăm ‘nâi hdrối ‘na tơdroăng tơngê lo mơheăm a vâi hdrêng:

“Pin đi đo hbrâ rơnáu, ƀok thái pơkeăng đi đo pơchân mơngế châi tamo tâng tâ môi tiah châi klêa, tôu tuăn, krôu pakố pá tá, lo mơheăm môh, mơheăm hnĕng, chêng kŏng hgíu, tuăn ngôa ôh tá tơniăn, vâi hdrêng koi môi tíu ôh tá vâ xah hêi, hêa lo mơheăm, lăm pơyâng mơdrêh prăng.Tâng ngăn nhên, hlo ai môi tiah nếo tối mê âi thế djâ vâi hdrêng rĕng lăm pôu hngêi pơkeăng hlối, tá mơngế hiăng kân tâng tâ, hlo ti mê thế rĕng lăm a hngêi pơkeăng”.

A Hngêi pơkeăng Nhi đồng 2, kơxô̆ mơngế tro tơngê lo mơheăm mot pơlât a hngêi pơkeăng tâk luâ 2 hdroh tâng vâ pơchông ƀă hdrối nah. Nâ Nguyễn Thị Lan, ngế rak ngăn kuăn ối tơxĭn hngêi pơkeăng Nhi đồng 2 ăm ‘nâi, tŭm 3 ngế kuăn nâ xuân tro tơngê lo mơheăm

“Hngêi á xuân ai môi to vó kân troh rơnó pơtê hriâm, vâi hdrêng ối a hngêi hên ôh tá lo pa gong. Ngế ki rơmúa á ôh tá tơmiât tro tơngê lo mơheăm. Troh hâi hâi má péa khăm xét nghiệm mơheăm tối o tơngê lo mơheăm. Mâu vâi muăn kơ’nâi mê xuân hlo vâi tiah mê xuân nhôm cho tơngê lo mơheăm’’.

Tiô Kơmăi khăm ngăn pơreăng tâ tú dêi Pơlê kong kân Hồ Chí Minh, sap hâi apoăng troh nôkố, kơxô̆ mơngế tơngê lo mơheăm Dengue hiăng tâk vâ chê pái hdroh tâng vâ pơchông ƀă hơnăm 2024 (tâk vâ chê 4000 ngế). Mâu hngêi pơkeăng hiăng tối ai vâ chê 300 ngế tơngê râ (tung mê ai lối tơdế to mâu ngế lo ing mâu kong pơlê ki ê, pơlê kong kân ki ê pơtroh troh akô pơlât tơdrêng). Nôkố pơlê kong kân hâi tâng tối ai ngế ki hlâ xua tơngê lo mơheăm.

 Khu xiâm ngăn pơkeăng Pơlê kong kân Hồ Chí Minh tối tơbleăng hdrối, rôh ki hên ngế tơngê lo mơheăm pơxiâm tâk a tơdế khế 6 ƀă tiô tối hdrối kô ton troh tâi khế 10 rêm hơnăm.  Vâ hbrâ mơdât pơreăng, kơdroh hlâ mơngế, mâu khu tơrŭm cheăng, khu grup ƀă tâi tâng kuăn pơlê  pro tơdroăng hbrâ mơdât pơreăng tơngê lo mơheăm Dengue.

Kơvâ ngăn pơkeăng krếo thế kuăn pơlê hbrâ mơdât đi đo. Mê thế, klâp xi kơnâp vó hdoăng têa ki vâ xúa rêm hâi, tơkŭm ăm xĭng  khăng prâu tah mâu tơmeăm xua ki toăng têa ‘mêi, lơ ai kiâ ngu ngĕng kơtâ, ok tah têa toăng a kơtháu, kơ’lo reăng, kơtôu chêng rơxế ton.

Mơgrúa krúa lĕm hyôh kong prâi rơtâ tá hngêi, pôi tá ăm êa rơtôh, kơđu tíu lâi têa châ toăng, koi kơmăng thế hnhâng mitơkel xúa kơbin xôh, lơ hrik ƀă kế ki peăng vâ kơdê tri trôu. Drêng tâ tơngê, thế lăm pôu a hngêi pơkeăng vâ khăm ƀă pơlât, pôi tá hmếo pơ rôe ôu xêh pơkeăng a hngêi.