Êp nglah pe dŭt ƀon Trum, xă Tâm Thắng, nkuăl Cư Jut, lah jay mhe ndâk ƀư hvi 90 mét vuông têh uĕh bah wa Y Tem Kpơr. Tâm neh jay, ăp ntrong cà phê uĕh nđĭr dôl kơn play. Wa Y Tem nkoch, rnăk wâl wa tăm tâm nuĭh jêr jŏt ngăn ƀon, đah 7 nuĭh sa, geh prăk knơm tâm đêt sào cà phê n’hanh nar luh manh bu đêt geh đêt mô. Knơm bôk nău kan Rƀŏng tĭng lam dak mpeh n’hŭch ach o, nău geh n’hanh nău rêh bah rnăk wâl lĕ rgâl tĭng nar. Bah bôk năm 2022 tât aƀaơ, rnăk wâl wa tĭng nuih dơi jao an ndrôk ntil, ntop kơl tăm tay cà phê, n’hanh dăch aơ ngăn lah ndâk ƀư jay gŭ. Lĕ rngôch lĕ jêng nuih n’hâm gay rnăk wâl wa Y Tem rŭn hao:

Lor rnôk geh nău ntop kơl bah ngih dak, nău rêh bah mpôl hên ŏk r’ah, ngih wâl gŭ truh sat tâm jay kđar ntưp tôl ơm. Aƀaơ rklaih ach o, jay gâp dơi ntop kơl du mlâm ndrôk ntil 20 rkeh prăk n’hanh 70 rkeh prăk ndâk ƀư jay, aƀaơ ri mô hôm klăch mih sial tay, nău rêh lĕ đăp mpăn. Aƀaơ gâp mât ndrôk gay an ndrôk pơng deh tay n’hanh mât chăm cà phê, aƀaơ rnăk wâl gâp lĕ rklaih ach o. Gâp dăn lah uĕh Đảng n’hanh ngih dŭt âk.

Tă bah ƀon Trum mô ngai, ƀon Ea Pô dôl rgâl tĭng nar knơm ăp nău kơl n’hŭch ach o. Wa H’Buan Kbuôr, rnoi nuĭh Êđê, bah rnăk ach o ngăn ƀon, knơm dơi ntop kơl ndrôk ntil n’hanh 70 rkeh prăk ndâk ƀư jay, ndrel nău nsrôih bah rnăk wâl, wa lĕ geh jay nâp hvi, joi nău rêh đăp mpăn. Jay mhe jêh, kon ndrôk dôl bŭn, n’hanh trong rklaih ach o ntơm bah nău kơl ngăn ngên bah Đảng, Ngih dak. Wa H’Buan rhơn an gĭt:

Jay gâp geh 4 sào neh n’hanh manh tay 2 sào lah 6 sào, yor săk play mô âk jêng gâp knŭng nsĭt geh 40 rkeh prăk. Bah năp đaơ rnăk wâl jêr jŏt yơn dơi ngih dak kơl ƀư jay, aƀaơ nău rêh đăp mpăn. Gâp lah uĕh âk ngăn.

Tâm Thắng lah xă ơm ƀư lŏ mir, tă bah nklang n’gor Dak Nông nklăp 110 km-Bí thư Đảng ủy xă an gĭt, lvang 2021-2025, xă dơi tâm pă bơi 3 rmen prăk bah bôk nău kan n’hŭch ach o gay ntop kơl di nuĭh đah jay gŭ, kon ntil, ndoh ndơ tuch tăm. Knơm nĕ, rnoh rnăk ach o hŭch bah 5,3% jŭr hôm 1,9%, rgop kơl xă tât lor thôn ƀon mhe năm 2024 n’hanh jêng ntŭk uĕh ang n’hŭch ach o nkual jru ngai ta n’gor.

Wa Trần Thế Quang nkoch du đêt nău blău ơm ƀư tĭng rnôk wơt dơn tơm prăk n’hŭch ach o bah Trung ương an ƀon lan.

 Tâm rnôk mbơh ƀư, mpôl hên na nao n’hao prêh nău ƀư tơm bah nsum mpôl ntŭk gŭ âm n’hanh yor nău lăp bah nuĭh ƀon lan dơi dŏng geh nău kơl. Tĭng nkô̆ nĕ, jêh rnôk nuĭh ƀon lan wơt dơn prăk ntop kơl bah ngih dak, dŏng di nău ŭch, mât uĕh săk rnglăy. Bah meng nĕ, mpôl hên n’hao nău ƀư tơm groi nđôi bah mặt trận n’hanh nsum mpôl gay đăp mpăn nău mbơh ƀư bôk nău kan rƀŏng tĭng mô geh roh rui, mpŭng lir, an jêng geh săk rnglăy na nê̆.

Bôk nău kan rƀŏng tĭng lam dak hun hao wăng sa rêh jêng nkual rnoi mpôl đêt n’hanh nkual yôk, lvang 2021-2025, dơi ƀư ta nkuăl Cư Jut, lĕ nsĭt âk nău rgâl uĕh. Hang rhiăng rnăk ƀon lan dơi ntop kơl ngăch mpeh neh gŭ, neh tuch tăm, dak kloh uĕh, joi nău rêh... Đah bơi 40 rmen prăk ndơ̆ an prăk, Cư Jut lah nkuăl ƀư tĭng săk rnglăy ngăn, rgop ndơ̆ âk xă tât lorr thôn ƀon mhe. Tĭng wa Trần Mai Việt-Groi Kruanh jrô kan mât uănh Rnoi nuĭh n’hanh chroh rƀŭn nkuăl Cư Jut, Bôk nău kan rƀŏng tĭng lam dak n’hŭch ach o lơ mât uĕh săn rnglăy lơn tay rnôk n’gâng kan ƀon lan 2 gưl na nê̆ pah kan. Gưl xă mbra na nê̆ mât uănh, tâm pă tơm prăk, dêr geh chah chrai, jong hvi.

Bah năp đaơ geh tât 10 bôk nău rgop an tâm nchră, tâm pă an âk ntŭk kan mbơh ƀư, dơh tâm pă, jêr groi nđôi n’hanh mô tâm ban. Tât aơ tay jao sĭt du ntŭk mât uănh rnôk dơh lơn tâm ƀư tĭng. Lơn lah, jêng jao na nê̆ an gưl xă mbơh ƀư, gay nuĭh ƀon lan dơi geh dŏng na nê̆, dêr nkĭng nkăng kơt bah năp, nkre dơh wơt dơn, nkre mât uĕh săm rnglăy kloh na nê̆ lơn.

N’hêl na nê̆ an saơ, Bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt n’hanh nkual yôk ta nkuăl Cư Jut lĕ n’hanh dôl nsĭt nkô̆ nău dŭt n’hâm, ntrŭt ntrôl jru tât kônh wa rnoi mpôl đêt hôm e jêr jŏt. Aơ lah uănh khlay ngăn ngên, di sŏng, rgop khlay an hun hao wăng sa-rêh jêng n’hanh jut ji ngot ach o ta Dak Nông. Rnôk n’gâng kan hành chính bar gưl dơi jêh, nău mbơh ƀư bôk nău kan an dơi rgum lơn gay geh săk rnglăy ngăn, tĭng dăn đă tă bah dâng.