Jêh rlau 10 năm ntrŭnh, Nau ntrŭnh mrô 42/2012 ndrel nau ntrŭnh 64/2015 hŏ kơl an bơi tât 570 rbăn nŭih pah kan rnoi mpôl đê̆, đah rnoh prăk rlau 1.270 rmen. Ăp nau kan aơ hŏ rhop nau pă kan pah đăp mpăn, n’hao nau nâp nŭih kan ndrel ntrôl nau hun hao văng sa, rêh jêng tâm âk nkuăl hôm jêr.

            Yơn lah, nau ntrŭnh ngăn hôm âk nau ê dơi: Tih nau dŏng kơt hôm hvêt rnôk mhe geh 13/25 n’gor ƀư kơl an, rnoh kơl dêh, mông kơl gleh; nau kan hành chính mbrơi, hôm ƀư nau tăch rgâl jêr geh dŏng; nau kơl an ê geh ăp nau kan kơt ê nkra ndơ tuch tăm. Tâm rnôk ntŭk nŭih hăn pah kan rnôk aơ rgâl ngăch, nau ƀư rgâl bar nau ntrŭnh nê jêng nau kan khlay ndal.

            Ta rơh tâm nchră, ăp ntoh măt hŏ mbơh kloh nau rgop gay ƀư jêh nau kan tĭng ntrong hăn ndrel geh nau dơi lơn. Wa Lương Thị Oanh, Giám đốc ntŭk tâm boh nau kan geh nau ŭch săch ndrel ntĭm nti nŭih kan lah rnoi mpôl đê̆. Yơn lah, rnoh kơl an rnôk aơ hôm dêh, nau ƀư ntĭm nti ê tâm di ma nau geh ngăn ri ma mô dơi rgum nŭih kan. Nau kan ân geh rgâl lơn tay tât nau dơi, nau geh bah nŭih pah kan rnoi mpôl đê̆. Wa Oanh đă:

            ‘Du jrâu ntĭm nti geh kơl ntơm 5-7 rkeh, yơn lah jŏ jong rlau 3 khay ri mra khuch ngăn tât nau geh dơi, nau rêh bah nŭih ƀon lan, tă lah n’gâng tơm khlay tâm rnăk vâl. Gâp đă ntŭk ƀư nau kan tâm ntĭm nti tâm nkuăl, êp ma ntŭk rêh ndrel pah kan, gay nŭih kan nkre ntĭm nti, nkre geh dơi lŏ pah kan’.

            Wa Huỳnh Thị Liên Hoa, Ƀư nau kan rđau trong pă nkuăl-Viện rgum ƀư ndrel ê nkra nau kan tuch tăm (N’gâng kan tuch tăm ndrel ntŭk ntu) mbơh, nau kan rnôk aơ hôm âk nau nkol, ƀư ntŭk ƀư nau kan mâp âk nau jêr:

            ‘Đă ân mpơl saơ nŭih kan lah nŭih rnoi mpôl đê̆ ri jêr đŏng. Nau aơ rnôk aơ ê geh nau nsing mbơh tâm căn cước công dân, ri ma ntŭk ƀư nau kan ân geh năl ndrel ntop tay âk ntil hồ sơ. Tâm rnôk ăp nau rgâl mpeh nau kan hành chính, nau kan ân geh rhuăt gleh lơn, ngăn lah hôm đăp mpăn geh mât nâp. Đah nau ntrơn rgâl mrô rnôk aơ, lah ntŭk mât nau kan ndrel lăp ƀư ri mra dơi kơl an ntŭk kan tăch rgâl tam ngăn”.

            Âk ntoh măt kŏ đă pơk hvi nŭih geh kơl an, gĭt năl kloh nkuăl geh kơl an jur tât gưl xã gay tâm di lơn ma nau dôl geh; nkre lah, nau ntrŭnh kơl ân geh ân geh nkra nâp tâm ban ma ăp luật ndrel bôk nau kan hun hao ƀon lan êng. Ndrel ma nê, ân geh ntop tay nau dơi nchră săk tam bah nau kan jêh rnôk geh kơl an, ntrŭt dăng nau tâm rgop đah ntŭk ƀư nau kan, tâm boh nau kan, n’gâng kan nkuăl, đăp mpăn nau dơi nâp nâl tâm nau hun hao nkuăl rnoi mpôl đê̆.

            Rơh tâm nchră geh uănh lah nau tâm ôp nchră khlay, rgop nau ƀư jêh nau nchrăp rgâl nau ntrŭnh mrô 42/2012 ndrel nau ntrŭnh 64/2015 gay mbơh Thủ tướng Chính phủ uănh tâm rơh tât. Nkô̆ nau rƀŏng tât lah ndâk nau nau kan ueh, ngăn, tâm ban, njêng nau nsôih jŏ jong ân nkuăl ƀư nau kan êng tâm nau dŏng ndrel hun hao nŭih kan bah nkuăl rnoi mpôl đê̆ ndrel gôl yôk tâm rnôk mhe. Wa Lê Đức Thịnh, N’gâng kan văng sa tâm boh ndrel hun hao ƀon lan, lah rjăp:

            ‘Phung hên mra mĭn nau mbơh nchră nau gay geh nau kơl an ân rgum, ntrŭnh ƀư tĭng nau kan du mpông, gay ƀư jêh ăp nau ntrŭnh nkuăl rnoi mpôl đê̆ pơk trong gay ăp ntŭk kan tăch rgâl, ntŭk ƀư kan văng sa bu dơi geh ndơn dŏng ăp rnoh kơl an du trong ueh lăng ngăn”./.