Nar ntri (18/6), ta Dak Lak, Cục wăng sa tâm boh n’hanh hun hao thôn ƀon – Bộ Nông nghiệp n’hanh Môi trường ƀư Tâm nchră nsŏng kơl rgâl nkra nău n’glêh an 42 năm 2012 n’hanh nău n’glêh an 64 năm 2015 bah Thủ tướng Chính phủ gay wat jêh trong ntop kơl ăp doanh nghiệp, leo dŏng nuĭh kan lah nuĭh rnoi mpôl đê̆ ta nkual mpeh yôk yang, nkual dŭt jêr jŏt mha êng.

Lôch du rach năm an ƀư, hŏ geh bơi 570.000 tơ̆ nuĭh kan nuĭh rnoi mpôl đê̆ dơi ntop kơl lĕ rngôch rnoh prăk rlău 1.270 rmen prăk. Ăp trong kơl dja hŏ rgop nta joi nău kan đăp mpăn, n’hao săk blău tơm nuĭh kan n’hanh ntrŭt ntrôl hun hao wăng sa- rêh jêng kon nuĭh. Yơn lah, an ƀư ngăn ntoh âk nău mpăng đêt đŏng: n’glĕ nău dơi dŏng hôm huêt; rnoh âk ntop kơl, mông nar glêh; siƀŭt âk mpưm ƀư doanh nghiệp jêr tât….Ta tâm nchră, ăp đại biểu hŏ rgop sŏng gay ƀư wat jêh trong kơl tĭng trong rƀŏng ngăn ngăn n’hanh geh nău dơi lơn. Tâm nchră lah njuat hăn khlay rgop ƀư wat jêh trong nchrăp rgâl nkra ăp nău n’glêh an gay hao rblang dăn Thủ tướng Chính phủ mĭn uănh, rdâk njêng trong kơl ăp kôp, njêng suan ntrôl jŏ jong an nkual wăng sa êng bah dih ngih dak tâm nău dŏng n’hanh hun hao tơm nuĭh kan nkual ƀon  lan rnoi mpôl đê̆ n’hanh mpeh yôk yang tâm nô nău mhe.