N’gor Dak Lak n’hanh Phú Yên mhe geh siƀŭt mbơh rblang, dăn đă Thủ tướng Chính phủ ŭch dơn ntuh kơl rdâk njêng trong cao tốc Phú Yên – Dak Lak ntơm bah năm 2026 rgâl bah hôm kâp jŏ tât bah kơi năm 2030 kơt ntơm nơh n’hanh mô hôm dŏngt 100% tơm prăk ngân sách.

Tĭng nău dăn đă, njăr trong jong nklăp 122 km, bôk nthoi đah trong cao tốc Bắc – Nam mpeh luh nar, bôl dŭt tâm chruh đah trong Quốc lộ 14; rnoh dĭ 4 mbor ndeh, rnoh ngăch weh ƀư 100 km/h, geh mbor nsrŭng ndal. Lĕ rngôch rnoh ntuh kơl nklăp 29.000 rmen prăk (mô hŏ kơp lĕ ma deh prăk kon manh tâm rnôk rdâk njêng). Pah kan nchrăp ntuh kơl ƀư ntơm bah 2025 – 2026; rdâk njêng ngăn ntơm bah năm 2026 n’hanh nchrăp lôch jêh tâm năm 2029. Njăr trong cao tốc Phú Yên – Dak Lak mô dơn pơk luh trong hun hao nchuăn rdeng bah ndrâm dak lêng Phú Yên tât ăp dak Tiểu vùng sông Mê Kông, ma hôm ntrŭt ntrôl tăch ndơ tuch tăm kơt cà phê, tiêu, sầu riêng… hăn ăp n’gor Duyên hải Nam Trung Bộ.