Bol ma trôk mih mô lah duh, yuh Ma Rương, kruanh HTX Dâu tằm Đạ M’rông, xã Đạ N’rông, nkuăl Đam Rông, n’gor Lâm Đồng way ngăch tât ăp rnôk geh ăp rnăk tă tơm an ndrŭng sa nsĭt tay nău geh đăp mpăn, mbra dơi kơl an ƀon lan bah ach o, jêng yuh lĕ geh njêng HTX n’hanh rgŏ jă âk nuĭh ndrel tât râng. Bâh ntơm bar pe rnăk rong đê̆ đă bâh rmôt kan ndrel, tât aƀaơ, HTX lĕ geh n’hao tay jêng 9 nuĭh kan ndrel n’hanh bar pe jât rnăk ƀon lan kan lŏ mir ta ntŭk tât râng.

Yuh Ma Rương an gĭt, tơm an ndrŭng sa ta Đạ M’Rông hun hao ueh, rnoh khlăy tăch tăp ndrŭng ta rnoh khlăy bâh 180 tât 200 rbăn prăk/kg jêng nuĭh tăm tơm an ndrŭng sa lĕ bah ach o, aơ lah nău kan nsĭt tay nău geh đăp mpăn jŏ jong gay ma hun hao wăng sa rnăk vâl.

“Săk rnglăy wăng sa nsĭt tay lah dŭt âk ngăn, njêng nău geh đăp mpăn, pă nău kan, n’hao tay nău geh đăp mpăn an ƀon lan. Nău kan tăm tơm an ndrŭng sa aƀaơ lah dŭt dơh ngăn, kơt lah geh dŏng nuĭh kan ta ntŭk, oh kon se n’hanh nuĭh ranh lĕ dơi tât râng kan da dê. Oh yuh bu ur tâm rmôt kan ndrel rĭ tâm mbơh mpeh kĩ thuật, nău mât chăm, nău kan rong lôch nĕ tâm kơl kan. HTX rĭ pă ndơ kơl mpeh nău pah kan tuch tăm, mbơh mpeh kĩ thuật mât tpưm an ndrŭng sa, kơl mpeh kĩ thuật tăm n’hanh mât chăm. râng geh ăp năm lĕ pơk luh du trong nti nău kan mhe gay ma ntĭm nti nchŏng kan an ăp rnăk ƀon lan mhe lăp kan”.

Lah du rnăk tă ta rnoh rnăk ach o, aƀaơ rnăk vâl yuh Liêng Jrang K’Brao, thôn Đạ Tế, xã Đạ M’Rông, nkuăl Đam Rông, lĕ geh rgum prăk kan, rvăt năp ndơ geh ăp ndơ dŏng khlăy tâm di đah nău ŭch dŏng ăp nar. Yuh Liêng Jrang K’Brao nkoch, nĕ lah bâh geh tăm tơm an ndrŭng sa. Rnôk mhe pah kan yuh dŭt mô vât ngăn, yơn bâh geh nău ntĭm nti na nê̆ bâh ăp oh yuh tâm HTX jêng nău tăm tơm an ndrŭng sa lĕ bên n’hanh blău hôm. Ăp khay, rnăk vâl lĕ geh nău geh, nău wăng sa lĕ đăp mpăn.

“Du rơh rong ndrŭng klâp ma 15 tât 16 nar rĭ he geh tăch klâp ma rlău 10 rkeh. Rđil đah nău ƀư mir rĭ gâp saơ nău rong ndrŭng aơ dơh lơn n’hanh ngăch đŏng. Ngăn lah nău kan aơ lĕ tâm di đah ăp năm deh đŏng

Tĭng nău mbơh bâh wa Kră Jan Ha Siêng, groi kruanh UBND xã Đạ M’Rông, tăm tơm an ndrŭng sa lĕ jêng nău kan jut jăng ach o ta aơ. Aƀaơ lam xã lĕ geh n’hao tăm 118ha tơm an ndrŭng sa đah rhiăng rnăk tât râng mât ndrŭng. Rnoh aơ lĕ geh xã mpŏng kan pơk hvi tay hun hao tâm let năp tay.

 “Ta xã Đạ M’Rông rnoh neh tăm tơm an ndrŭng sa lĕ geh rlău 100ha hôm. Tăm tơm an ndrŭng sa lĕ nsĭt tay săk rnglăy âk, ăp rnăk lĕ geh năp nău rêh đăp mpăn ăp nar,rvăt geh máy mok gay ma kơl tâm nău pah kan jan sa. Ăp rnăk lĕ nănh tâm mbơh tâm kơt nău kan, bâh rnăk vâl nti an rnăk êng. Aƀaơ rnoh rnăk ach o ta xã lĕ hŭch âk. Tâm let năp tay mpôl hên mbra mbơh tơih tay, rgŏ jă ăp rnăk lĕ dơi ƀư mbơh tơih, ntĭm leo ăp rnăk mô hŏ blău gay ma ndrel hun hao wăng sa rnăk vâl, ntop kơl an ta ntŭk hun hao wăng sa- rêh jêng”.

Ndrel đah ăp ntil tơm tăm, ntil rong êng, tăm tơm an ndrŭng sa geh Đam Rông ndŏ lăp dŏng ta nghị quyết hun hao wăng sa- rêh jêng, ntrŭt đă nuĭh ƀon lan rgâl mhe ăp rnoh neh tơm tăm mô săk rnglăy jêng tăm tơm an ndrŭng sa. Wa Liêng Hót Ha Hai, groi kruanh UBND nkuăl Đam Rông an gĭt, nkô̆ ŭch nsrôih tât năm 2030, rnoh neh tăm tơm an ndrŭng sa hao rlău 1.350ha, geh dŭt đê̆ lah 2.500 rnăk rong ndrŭng ƀa ƀơ, dŭt âk lah nuĭh rnoi đê̆.

“Dŭt năm 2024 mhe nơh rĭ rnoh rnăk ach o nsum âk ding bâh nkuăl Đam Rông kanŭng hôm 7%. Nău rêh bâh ƀon lan geh âk nău rgâl mhe, rgâl bâh ndơ sa, ntŭk gŭ, pah kan jan sa. Ntơm nơh ƀon lan hăn pah kan tuch tăm geh bâh kâp mih lăng prăng sơh dơm, nău mĭn ƀư êng sa êng, aƀaơ ƀon lan pah kan lĕ gĭt nkrem, gĭt dŏng khoa học kĩ thuật tâm nău pah kan jan sa, gĭt tăm gĭt mât rong geh ndơ tăch rgâl khlăy”.

Bâh nkual neh tă dŭt ach o ta lam dak, nkual njônh ngai Đam Rông bâh Lâm Đồng dôl ntơm rgâl n’hao mhe. Knơm an lah, đah ăp nău kan wăng sa an tâm di, ntrong kan mĭn kan mhe n’hanh nău hăn ndrel bâh n’gâng kan ta ntŭk, trong n’huch ach o, ƀư n’hao sâm geh tâm di bâh nuĭh rnoi đê̆ ta Đam Rông mbra hôm nha geh pơk hvi tay lơn tâm let năp atay.