Sêt ntêng dơi uănh lah ngoăy tâm ăp ndơ an neh bri nsơr an kon nuĭh tâm bôk yan mih ăp năm. Aơ lah ndơ sa kah ngăn geh âk ndơ kah. Sêt knŭng hon du tơ̆ dơm tâm năm ta ăp ntŭk geh sêt ƀư mpơng.

Yuh H’Lươm Buôn Krông, nuĭh Êđê, ta ƀon Alê B, phường Êa Tam, nkual ƀon têh Buôn Ma Thuột, n’gor Dak Lak an gĭt: Rnôk hăn joi sêt, an geh nău blău ơm gay dêr geh sêt khih.

Tĭng nău blău ơm bah ăp nuĭh joi sêt, sêt knŭng ntoh ta ntŭk geh âk nchiăr nglap gŭ rêh, ƀư mpơng. Nău joi di mô lah knŭng an uănh mô dah kuih rchoăl neh jêt jŭm dăr, lah saơ nglap nchiăr, mbra nĕ lah sêt ntêng.

Gay dơi mât lĕ nău ƀô kah bah sêt ntêng rnôk pâk sĭt, yuh H’ Lươm nkoch nău blău ơm:

Ŭch sêt ntêng mât nâm ơm kah, njŭng, jêh rnôk pâk sĭt, sêt an dơi gâm dâl mô lah mât nsâh gay dêr ƀư djơh mbra ƀư n’hŭch nău khlay kah.

Đah njŭng, ƀô kah đêt, sêt ntêng way dơi dŏng gay gâm jêng âk ntil ndơ sa uĕh kơt wâr, kho, gâm trau, rŭk por... dŭt kah mbung sa da dê n’hanh kah an săk soan. Tâm nĕ, sêt ntêng wâr lah ndơ sa dơh gâm, dơi âk nuĭh ŭch dŏng. Yuh Nhung Đăng, gŭ ta phường Êa Tam, nkual ƀon têh Buôn Ma Thuột, n’gor Dak Lak an gĭt nău gâm sêt ntêng wâr.

Sêt jêh rnôk pâk sĭt, rao kloh neh krêp ta sêt, rao đah dak bôh jêh nĕ an nsâh, an du đêt dak ngi tâm glah, wâr ƀô kah mlăng jêh nĕ an sêt wâr, gay mât nâm ơm njŭng n’hanh ƀô kah bah sêt knŭng an đêt bôh ƀot ngot.

Đah âk rnăk ƀon lan rnoi mpôl Êđê, sêt ntêng gâm đahblân tăng lah ngoăy tâm âk ndơ sa kah tâm “yan sêt ntêng”. Nkoch nău blău gâm trau blân tăng đah sêt ntêng, wa H’Yok Êñuôl (way kuăl Aduôn H Yuôm), ta Ƀon Alê B, phường Ea Tam, nkual ƀon têh Buôn Ma Thuôt an gĭt:

Rnôk nchrăp tŏng ăp ndơ, gâp n’gơ glah gâm an blân tăng, mrăch, nting sŭr rbân. Jêh nĕ an sêt ntêng dơi rao kloh lĕ nsâh dak an tâm glah, gâm tay du đêt jêh nĕ nsĕt ŭnh. Jêh nĕ sŏk rnăi jŏn hăch, an tay glah gâm rđŏk, uănh bôh ƀot ngot di sa, n’glêh dŭt lah klôih he, lĕ geh glah trau kah an rnăk wâl ndrel sa.

Trau blân tăng gâm sêt ntêng geh ƀô tăng ntĭt mpơl bah blân, njŭng bah sêt nglăp ndrel đah hăng bah mrăch, lơn lah ƀô kah ntĭt mpơl bah klôih he mbra jêng du trau sa geh bôh kah âk nkah gĭt mro mô dơi chuêl.

Sêt ntêng lah du ndơ nsơr an khay bah neh bri an nkual neh Tây Nguyên âk duh sial. Nar aơ, rnôk bri mbrơi ngai, nău tuch tăm mir ba uĕh blău lơn đŏng, jêng nău joi sêt jêr đŏng. Yor mpêt khar, rnoh khlay sêt tăch bah 300-500 rbăn prăk du kg bôl sêt mŭn mô lah lĕ dang, yơn geh prăk mô dơi rwăt

Lah geh rơh wêh khâl nkual neh aơ tâm yan mih, lap băl mbả dơi sa ăp trau sa uĕh kah bah sêt ntêng, gay saơ tŏng ăp ƀô kah ntĭt mpơl ơm geh bah yôk bri.