Vă kon pơlei, mă kăl noh unh hnam kon pơlei kon kông hăt hot vang akŏm choh hơmet var pơgar, jơnŭm pơgơ̆r tơring, jơnŭm jang tơpôl kơ dêh char Kon Tum pơm jang tơnăp tơdrong tơgŭm hơdrĕch 'long pơtăm, pơtho kih thuơ̆t păng jang hadoi hăm dôm tơdrong tơgŭm đơ̆ng dôm tơdrong tơchơ̆t jang kơ teh đak vă tơgŭm kon pơlei.

Đơ̆ng noh ăn ƀôh, jô̆ truh khei 4 ou ki, jơ̆p dêh char Kon Tum hlôi choh hơmet đei hloh 3.480 hectar var pơgar vă pơtăm sâu riêng, ƀơr, pơ-ŏ, măk ka, kaphê dah mă pơtăm 'nhot ƀum 'nou nai hia... trŏ hăm tŏ 'mi kial, teh kơ rim tơring. Đơ̆ng tơdrong choh hơmet var pơgar kơ unh hnam ăn ƀôh hlôi tơgŭm ăn jê̆ 19.500 unh hnam kon pơlei tơ̆ dêh char Kon Tum, lơ̆m noh đei hloh  16.500 unh hnam kon pơlei kon kông hơtŏk đei tơdrong hơrih rim năr păng hiôk hian hloh lơ̆m tơdrong jang hơtŏk mŭk drăm unh hnam.