Vă ăn bơ̆jang pơlong lăng, prăt khei kơ âu, Grŭp 1 ‘măng ‘noh đei 5 ‘nu jang yua đơ̆ng Kơdră Anih vei lăng phường Nghĩa Phú, pơlei tơm Gia Nghĩa, dêh char Đắk Nông vei lăng, athei hơnơ̆ng kơrŭn jang tŏk jơ vă hơmet pơ ‘lơ̆ng hla ar oei đei, klăih song hla ar kăl, jô̆ hơlen mŭk tơmam... hơmet ăn pơjao hơdrol tơmơ̆t hơdai. Mŏ Trần Thị Thu Hiền, mĭnh ‘nu bơngai jang tơ̆ anih bơ̆jang tơ̆ pơlei tơm Hồ Chí Minh păng Đắk Nông, mŏ oei tam mă gan băt tơ̆ hơnăp tơdrong tơplih tih ‘nâu. Mă lei, đơ̆ng rŏng ‘măng pơhrăm lơ̆m ‘năr 13–14/6 âu ki, mŏ hlôi băt vă tôm tơdrong jang đei pơjao tơ̆ hơnih bơ̆jang ‘nao.

“Tơdrong jang tơ̆ anih jang so dăh mă ‘nao đơ̆ng rŏng kơ tơmơ̆t hơdai kŭm lei lăi băl đĕch, yua tă kơ sơng iŏk, pơdreo pơtôch pơvih pơvăn teh đak păng bơ̆jang kiơ̆ Tơdrong jang 06 găh tơplih kơsô̆. Vă jê̆ truh âu hơnăp jang gô roi tŏk, mă lei yua kơ đĭ pơm joăt păng kŭm dai sơđơ̆ng tơ̆ phường so bơih kơna ĭnh tơchĕng kơdih gô iŏk jang đei. Mă đơ̆ng tơdrong jang rŏ lăng lơ ƀiơ̆, dăh mă tơdrong jang ‘nao ƀiơ̆, mă lei hơdrin 1 tŏ sĕt ‘noh gô jang đang ‘lơ̆ng hơnăp jang đei pơjao.”

Kiơ̆ tơdrong jang proh hơmet khŭl bơ̆jang dêh char Đắk Nông, dôm phường Nghĩa Phú, Nghĩa Tân păng xăh Đắk R’moan gô đei tơmơ̆t hơdai jing phường Nam Gia Nghĩa, hăm anih bơ̆jang pơm tơ̆ kơsô̆ 2 Võ Văn Tần, phường Nghĩa Tân, jĭ hơnih bơ̆jang kơ Anih vei lăng kon pơlei pơlei tơm Gia Nghĩa hơdrol kơ tơklăh. Ƀok Vũ Minh Nghĩa, Bí thư Đảng phường Nghĩa Phú roi tơbăt, bơngai jang chĕp kơ̆l pơgơ̆r phường Nam Gia Nghĩa đei iŏk đơ̆ng kang ƀô̆ kơ Anih jang Đảng dêh char, Anih jang Đảng pơlei tơm păng 3 phường xăh tơm:

“Trong jang ăn bơ̆jang kiơ̆ tơdrong jang ‘nao, ăn bơ̆jang pơlong lăng dôm Bí thư anih jang Đảng, Kơdră Anih vei lăng kon pơlei phường, Kơdră Jơnŭm pơgơ̆r kon pơlei păng Kơdră Anih jang Mặt trận Tổ quốc Việt Nam phường gô vang jang kiơ̆ rim hơnăp jang kơtă. ‘Ngoăih kơ ‘noh, 1 hơnih tă kơ đei dôm bơngai jang tơgŭm tơdrong tơgŭm ăn bơ̆jang kiơ̆ hơnăp jang đei klăih song ăn. Kơplăh ăn bơ̆jang tơdăh tơƀơ̆p tơhlăk tơhlĭn, tam mă tơproh ‘noh gô hôp vă pơgơ̆r lăng ‘moi kiơ̆”.

Ƀok Hoàng Công Hội-Bí thư Đảng phường Nghĩa Tân, pơlei tơm Gia Nghĩa roi tơbăt, tơring hlôi akŏm dăr hơlen pơđĭ đơ̆ng anih jang, tơmam drăm truh bơngai jang vă bơ̆jang kiơ̆ pơjao, hơmet ăn đơ̆ng rŏng tơmơ̆t hơdai. Đei dang 200 ‘nu kang ƀô̆, bơngai jang kơ teh đak bơ̆jang tơ̆ khŭl jang kơ phường Nam Gia Nghĩa đơ̆ng rŏng tơmơ̆t hơdai. Tơdrong ăn bơ̆jang pơlong lăng tơdrong jang phường ‘nao pơm kiơ̆ ƀlep pơtho đơ̆ng Anih tơm Nội vụ păng Khŭl kơdră teh đak.

“Kiơ̆ tơdrong jang đơ̆ng pơlei tơm pơjing kŭm nhen dôm tơdrong hơgăt, hla ar pơtho đơ̆ng Anih tơm Nội vụ păng Tơdrong tơchơ̆t đơ̆ng Khŭl kơdră teh đak, hăm phường Nam Gia Nghĩa gô pơjing dôm anih ‘noh: Anih pơvih; Lăm mŭk drăm - Anih jang anih kơdrơ̆m; Lăm joh ayŏ - Tơpôl; păng Hơnih bơ̆jang teh đak. Dôm anih jang pơtruh pơvih pơvăn teh đak ‘noh gô đei pơjing tơ̆ rim phường vă pơyua ăn kon pơlei 1 trong đei yua, lăp hăm ‘meh vă yan âu lơ̆m tơring”.

Kiơ̆ tơdrong jang đơ̆ng Trung ương, đơ̆ng ‘năr 1/7 truh, dêh char Đắk Nông gô tơ jur đơ̆ng 71 jur oei pă 28 anih bơ̆jang tơ̆ xăh, phường păng tơmơ̆t lơ̆m dêh char Lâm Đồng ‘nao. Dôm tơdrong hơdrin tơ̆ rim xăh, phường păng rim kang ƀô̆ tŏk bŏk ƀrư̆ ƀrư̆ bơ̆jang kiơ̆ ‘lơ̆ng tơdrong jang pơm tŏ sĕt bơngai jang, đei yua, ‘lơ̆ng. Tơdrong ăn bơ̆jang pơlong lăng păng jang pơkeh trong jang, gô tơgŭm khŭl kơdră chĕp kơ̆l tơ̆ xăh ‘nao iŏk đei tơdrong hrĕnh kăl mưh yak mơ̆t lơ̆m bơ̆jang tơpă.