Kơsơ̆ năr 22/06, tơ̆ Hơnih jang kơ Jơnŭm pơgơ̆r teh đak, Thủ tướng Phạm Minh Chính, Kơdră Jơnŭm pơgơ̆r dôm tơdrong tơchơ̆t jang kơ teh đak; Kơdră Jơnŭm pơgơ̆r pơlong pôk hơpah trung ương pơgơ̆r Hop akŏm jơ̆p teh đak sơkơ̆t Tơdrong tơchơ̆t jang kơ teh đak gah pơjing tơring tơrang 'nao, Tơdrong tơchơ̆t jang kơ teh đak tơjur hin dơnuh kơjăp sơđơ̆ng păng tơdrong jang "Jơ̆p teh đak atŭm jơhngơ̆m pơjing tơring tơrang 'nao", tơdrong jang "Kơyuơ bơngai hin dơnuh – Ưh đei prơih bơngai ayơ tơ̆ rŏng" jăl jang 2021-2025. Pơma ah Hop akŏm, Thủ tướng akhan: Tơ̆ apŭng hlôi keh đang sơnong jang kăp gĭt, Tơdrong tơchơ̆t jang kơ teh đak gah pơjing tơring tơrang 'nao hlôi sơkơ̆t đei hloh 50% apŭng đei jơnei tơchơ̆t tơring tơrang 'nao.

Kơyuơ noh athei pôk bơnê sơnong jang kơ apŭng lơ̆m hơtŏk choh jang xa, tơring pơsĕl păng bơngai jang mir, trŏ sơnong jang đei pơjao. Thủ tướng pơgơ̆r lơ̆m jăl jang 2026-2035, hơkŏp dôm tơchơ̆t jang kơ teh đak tŏk bŏk oei tơlĕch jang 1 tơdrong jang vă ưh đei hơlơ̆k hơle gah sơnong jang.  Thủ tướng ră hơdah tơdrong tơchơ̆t jang kơ teh đak gah pơjing tơring tơrang 'nao athei đei hơtŏk gah tơchơ̆t jang, pơih să tơring jang, bơngai đei yua, hơtŏk tơmam drăm OCOP.