‘Năr (22/06) tơ̆ Anih jang kơ Khul kơdră teh đak, Thủ tướng Phạm Minh Chính pơgơ̆r hop akŏm ‘măng mă 5 Anih pơgơ̆r jang kơ Trung ương găh sut pơđĭ hnam hiăh hiok lơ̆m teh đak; ‘Măng hop akŏm mă 18 Anih pơgơ̆r jang kơ teh đak găh dôm tơdrong jang gĭt kăl kơ teh đak, tơdrong jang tơm tơ̆ anih vei lăng trong nơnăm păng Hop akŏm mă 2 hơtŏk tơdrong tơlĕch jên jang kơ teh đak sơnăm 2025.

Ƀơm truh tơdrong tơlĕch jang "sut pơđĭ hnam hiăh hiok" lơ̆m teh đak: Thủ tướng ăn tơbăt, trong jang blŭng a vă jang đang adrol kơ sơnăm 2030, mă lei, mă tơpă mưh bơ̆ jang dôm anih tơm, anih jang kơpal, tơring tơrang hơtŏk đon tơnăp, bơ̆ jang tôch ‘lơ̆ng, mă loi ƀât mă vă tơbăt 80 sơnăm pơjing teh đak Cộng hòa xã hội Chủ nghĩa Việt Nam, yoa thoi noh khŏm bơ̆ jang tơjur ƀiơ̆ khei ‘năr jang kĕh tơdrong ‘nâu.

Tơchĕng ‘lơ̆ng dôm anih jang kơpal, tơring tơrang, anih tĕch mơdro vang tơlĕch jang tôch ai tơdrong jang "sut pơđĭ hnam hiăh hiok" lơ̆m teh đak, Thủ tướng athei drơ̆ng nơ̆r tơjur khei ‘năr jang đang tơdrong jang "sut pơđĭ hnam hiăh hiok" lơ̆m teh đak lơ̆m ‘năr 31/10/2025. Hơdrô̆ hăm "sut pơđĭ hnam hiăh hiok" ăn bơngai đei kŏng hăm kăch mang, athei adrin truh ‘năr 27/7 sơnăm ‘nâu ‘nŏh jang đang tơdrong sut pơđĭ hnam hiăh hiok ăn bơngai đei kŏng, unh hnam linh lôch tang teh đak, linh jĭ rơka.