Tơ̆ Dak Lăk, khul chih kơtơ̆ng ang kĕch mang hlôi hrôih đei pơjing, atŏk tơ iung đơ̆ng dôm sơnăm 30 kơ anglŏ hơdrol. Lơ̆m hnam pơnă Buôn Ma Thuột đei rim hla bơar kơtơ̆ng ang “Yuăn-Êđê”, “Xiềng Xích”, “Xích Sắt”, kơ yuơ rim đe ƀok Phan Đăng Lưu, Hồ Tùng Mậu pơjing păng bơ̆ jang chih ƀai hloi ... Dôm hla bơar kơtơ̆ng ang chih hăm ti 2 hlak hla bơar să tŏ tơpang ti vă kơ ƀônh chă pơtruh ăn dih băl mă lei oei kĕ vei lăng hrĕp, hlôi pơtho tơbăt ăn jơhngơm đon kĕch mang ăn bơngai pơnă.

Năr 1/5/1975, Radiô rapor Dak Lăk (hơnih tơm kơ Radiô rapor-pơdăh Tivi Dak Lăk) đei rapor blŭng a. năr 15/1/1976, Hơnih jang chih kơtơ̆ng ang Dak Lăk đei pơjing, pơm tơlĕch hla bơar kơtơ̆ng ang ăn kon pơlei pơla chă đŏk ‘măng blŭng ƀlep lơ̆m jơ ‘năr Têt Bính Thìn.

Atŭm hăm tơdrong atŏk tơ iung atŭm kơ lơ̆m teh đak, khul chih kơtơ̆ng ang dêh char Dak Lăk hlôi atŏk tơ iung kơjăp ‘lơ̆ng. Dang ei đei 54 hơnih bơ̆ jang chih kơtơ̆ng ang tŏk bŏk bơ̆ jang lơ̆m dêh char.

Tơ̆ hop akŏm, rim kơdră tang măt vang pơma dơnuh găh dôm tơdrong long lơ̆m chăl ‘nao, tơlĕch rim trong jang tơ iung pơjing khul chih kơtơ̆ng ang trŏ lăp hăm tơdrong pơkoĕl atŏk tơ iung. Kiơ̆ đơ̆ng bơngai chih kơtơ̆ng ang Đàm Thuần, Kơ iĕng Kơdră chĕp pơgơ̆r Ƀăo Dak Lăk, tơdrong pơkoel roi năr roi kơtang găh tơplih kơsô̆, bơngai jang chih kơtơ̆ng ang kăl vei kơjăp jơhngŏm đon ‘lơ̆ng kĕch mang, jơhngơ̆m đon ‘lơ̆ng tơdrong bơ̆ jang. “Hrei ou AI đei lơ phân mêm kơna bơ̆ jang chih kơtơ̆ng ang hrei ou ‘ngoăih năm bơ̆ jang hloi ‘noh bơ̆n gơ̆h iŏk yoa lơ tơmam drăm kơ AI vă tơgŭm ăn băt hơdăh kơtơ̆ng ang. Atŭm hăm tơdrong lăng hơlen, jơhngơm đon bơ̆ jang chinh trĭ kơ bơngai chih kơtơ̆ng ang, hăm tơdrong trŏ lăp tơpăt ‘lơ̆ng kơ tơdrong jang chih kơtơ̆ng ang, mă kăl hăm tơdrong sơnong jang kơ bơngai jang chih kơtơ̆ng ang kech mang. Iŏk yua mạng tơpôl păng pơjing hăp pơjing đei trong tơgŭm djru, pơjing đei hơnih pơtruh ăn, tơbăt ăn dôm tơdrong jang chih kơtơ̆ng ang”.

Rim bơngai tang măt jei drơ̆ng mĭnh nơ̆r, hăm tơdrong kăl kơ Dak Lăk, tơdrong chih pơtruh kơtơ̆ng ang ƀlep, tơtom, kăl hloh ăn kơ kon pơlei, mă kăl hăm kon pơlei tơring hơtăih yăih, tơring kon kông, ưh khan lăp tơdrong bơ̆ jang kăl mă oei jing hơnăp jang chinh trĭ, jơhngơ̆m đon ‘lơ̆ng kơ bơngai jang chih kơtơ̆ng ang. Khul chih kơtơ̆ng ang kĕch mang hăm hơnăp jang ‘noh gơng tơroh kloh klĕch ƀar păh Đảng, Teh đak hăm kon pơlei, kăl hơnơ̆ng jang ‘lơ̆ng hơnăp jang, sơnong jang tơgŭm djru,l lang să trong bơ̆ jang truh hăm rim răih kon pơlei, vă bu bu jei băt, pơm hơtŏk jơhngơ̆m đon hlôh vao, vei kơjăp tơdrong tơgoăt tơgoăl pôm nơ̆r ƀơ̆r đon kơjăp lơ̆m hơdrĕch hơdrung.

Ƀok Trần Hồng Tiến, Kơdră chĕp pơgơ̆r Hơnih vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ dêh char Dak Lăk tơbăt, dôm nơ̆r tơbăt dih băl tơ̆ pơma dơnuh gô tơgop ‘lơ̆ng hơ iă lơ̆m tơ iung pơjing khul chih kơtơ̆ng ang trŏ lăp hăm tơdrong jang hle.“Rim nơ̆r tơgop tôch trŏ lăp, ƀlep hăm tơdrong đei ƀôh yan ou kơ tơring. Rim hơnih bơ̆ jang teh đak, rim hơnih jang lăp đơ̆ng rŏng mơ̆ng dôm nơ̆r chă hơpinh, hơthei ‘noh gô đei dôm trong pơchoh ăn, trong jang vă pơjing đei jơhngơm pran tơgŭm ăn rim hơnih jang chih kơtơ̆ng ang, khul chih kơtơ̆ng ang bơ̆ jang ‘lơ̆ng hlŏh, tơgŭm jang ‘lơ̆ng tơdrong jang chinh trĭ kơ tơruing”.