Tung 6 khế apoăng hơnăm 2025, kong pơlê Dak Lak hiăng pêi pro tơdâng tơ’mô, tâi tâng ƀă châ tơƀrê mâu pơkâ dêi Khu xiâm Đảng, hnê mơhno dêi Khu xiâm kal kí, Khu pơkuâ tơdroăng cheăng Đảng ‘na rah xo pro lế lĕm tro tíu pêi cheăng tơnêi têa, tơkŭm po troăng pêi khu râ kăn pơkuâ 2 râ, iâ tro lĕm tro khu pêi cheăng tơnêi têa.

Pakĭng mê, kong pơlê tơkŭm hnê mơhno tah lôi mâu tíu ki kreăng tung mơnhông, tơleăng tâi tâng mâu roh xăm tối kơdrâm mơngế, ki ối pá hên ƀă ton xŏn. A hneăng hôp kố, Hô̆i đong kong pơlê Dak Lak séa ngăn tơbleăng mâu tơbleăng tơdroăng pêi pro hnoăng cheăng mơnhông cheăng kâ – rêh ối pơlê pơla 6 khế apoăng hơnăm, troăng pêi la ngiâ, hnoăng cheăng 6 khế mơ’nui hơnăm; 17 mơ-éa chêh hdrối pơkâ tơdjâk troh mâu kơvâ cheăng kâ, rêh ối pơlê pơla, liăn ngân, mơ’no liăn cheăng tơnêi têa, tơdroăng pơkâ xiâm tơnêi têa, troăng hơlâ tŏng gum; tơdroăng châ tơƀrê séa ngăn tơdroăng pêi cheăng hơnăm 2025 ƀă hên tơdroăng xiâm ki kal ki ê.