Tâi tâng mâu tơdroăng ki pêi mơnúa ngăn châ séa ngăn kơtăng krá, mơ’no tơdrêng ing troăng hyôh internet troh mâu tíu pêi cheăng ki xiâm vâ khu pơkuâ đi đo ‘na tơdroăng cheăng Đảng dêi Lâm Đồng, Bình Thuận ƀă Dak Nông ngăn. Tung pơla pêi mơnúa ngăn mê tơdroăng kố hlo châ tiô púi vâ.

Pôa Y Thanh Hà Niê Kdăm, kăn pơkuâ hnê ngăn Đảng Lâm Đồng, tối rơdêi, tơdroăng ki mâu tíu pêi cheăng râ cheăm pêi mơnúa ngăn ôh ti xê cho tơdroăng ‘na pêi ‘na kih thuât vâ pêi mơnúa ăm gá hmâ ƀă tơdroăng ki nếo, mê ối cho rôh ki tơ’lêi hlâu tung tơdroăng ai khât vâ mâu kơ koan, tíu pêi cheăng, cheăm bêng hbrâ rơnáu pêi pro klêi khu tơrŭm, kơ koan cheăng tơnêi têa.

Kố xuân cho “ƀai mơnhên ngăn” ivá cheăng pơkuâ, tơrŭm pơla mâu kơvâ cheăng, kăn pơkuâ râ cheăm nếo. Mâu tơdroăng ki tơvâ, tá hâi hlê plĕng khât kal châ ‘mâi rơnêu tơdrêng hdrối vâ tâi tâng 124 to cheăm, bêng, kơpong pêi cheăng pơxiâm păng ‘nâng pêi cheăng.

*Kơxê hâi lơ 23/6, bêng Nam Gia Nghiã (pơlê kong krâm Gia Nghiã, Dak Nông) hiăng pơxiâm mơnúa pêi apoăng. Mâu hlá mơ-éa pêi cheăng tơdjâk troh tơnêi tơníu, ‘na luât, mơhnên ‘na hlá mơ-éa rơpŏng hngêi... hiăng châ tơdah pêi cheăng ƀă pro tŭm hlá mơ-éa ăm kuăn pơlê, ăm hlo tơdroăng hbrâ ƀă mơ-eăm dêi khu kăn ki nếo.

Bêng Nam Gia Nghiã châ mơjiâng pro ing tơdroăng tơ’mot bêng Nghiã Phú, Nghiã Tân ƀă cheăm Đăk R’Moan (pơlê kong kơdrâm Gia Nghiã, Dak Nông). Túa pêi cheăng bêng ki nếo mê ai mâu: Ƀơrô, Ƀơrô Cheăng kâ - Tơmeăm khoăng kơphô̆, Ƀơrô Túa lĕm tro - Rêh ối pơle pơla ƀă Tíu xiâm pêi cheăng dêi tơnêi têa, ƀă mâu tíu pêi cheăng ing mâu kong pơlê ki tơ’mot tơdjuôm.

Tâi tâng kơxô̆ mơngế pêi cheăng ton hơnăm dâng 120 ngế. Tung hâi mơnúa pêi cheăng, tâi tâng mâu hồ sơ dêi kuăn pơlê ƀă Khu  khu mơdró xuân hiăng châ pro klêi tơ’lêi hlâu.