Vi ƀan hnê ngăn kong pơlê Gia Lai nếo ai mơéa pơkâ thế Đảng ủi Hô̆i đong hnê ngăn kong pơlê séa ngăn, pơtroh ăm Khu pơkuâ ngăn Đảng môi tuăn troăng pơkâ vâ Hô̆i đong hnê ngăn kong pơlê Pơkâ tŏng gum liăn môi xôh ăm kăn ƀô̆, kong chưk, viên chưk ƀă ngế pêi cheăng râ kong pơlê ki lăm pơhlêh troh tíu pêi cheăng nếo klêi kơ’nâi ‘mot tơkŭm ƀă kong pơlê Bình Định.

Tâi tâng kơxô̆ ngế ki châ pơxúa cho 1.844 ngế, ƀă tâi tâng kơxô̆ liăn cho 42,4 rơtal liăn, xo ing liăn kong pơlê Gia Lai hdrối vâ ‘mot tơkŭm. Troăng pơkâ kố cho vâ gum mâu ngế pêi cheăng ai tơ’nôm liăn ngân vâ roê kế tơmeăm xúa ki kal a tíu ối nếo. Tiô tối hdrối klêi kơ’nâi ‘mot tơkŭm, tíu cheăng – kal kí dêi kong pơlê nếo kô pro a kong pơlê Bình Định nôkố, kơtăn ing tíu pêi cheăng ton dâng 165 km.