Ntơm bah nar aơ (1/7/2025), 34 n’gor, nkual ƀon têh lam dak lăp dŏng ngăn n’gâng kan 2 gưl, lah gưl n’gor n’hanh gưl xã, lôch rlong lăp kan. Aơ mbra lah jâng ntơm lịch sử khlay tâm trong hăn rgâl mât bôk kan. Nar ntri, 30/6, lam dak du rut ƀư Lễ mbơh ăp nghị quyết, nău n’glêh an bah Trung ương n’hanh  n’gor mpeh n’glăp nsum nhih pah kan gưl n’gor, gưl xã, njêng mpôl kan đảng, nău ntrŭnh bah gưl ủy, HĐND, UBND, MTTQ n’gor, nkual ƀon têh, xã, phường, đặc khu, gay nar aơ 1/7 lăp dŏng ngăn trong leo ƀư n’gâng kan 2 gưl.

Hăn ôp uănh na nê̆ trong leo ƀư n’gâng kan bar gưl ta nkual ƀon têh Hồ Chí Minh, Tổng Bí thư Tô Lâm lah rjăp, nău ŭch dŭt têh bah nhih pah kan mhe lah yor hun hao ngăch, nâp dăng bah neh dak bah nkual ƀon têh n’hanh mât chăm uĕh lơn an nău rêh bah ƀon lan. Rdâk njêng n’gâng kan glêh tam, yach ngăch, rgâl bah mât bôk kan ndrât ndal tât jêng mât bôk kan nchrăp lor rhŏ dŏng an ƀon lan, n’gâng kan an ƀon lan, rhŏ dŏng an ƀon lan nta trong dơh an nău hun hao n’hanh tŏng geh nău dơi gay an ƀư geh nău tam ăp trong nchrăp bah Đảng tâm nău rêh ngăn ngăn yor nău hun hao nsum bah neh dak.