Truh dang ei, 6.465 tŏ hnam hlôi keh đang, 10 lơ̆m 17 tơring ming man keh đang tôm kơsô̆ hnam kiơ̆ nhen tơchơ̆t; lơ̆m noh 6 tơring hlôi keh đang tôm kơsô̆ hnam đei pơjao. Dôm tơring yuk hơlou noh: Pleiku, An Khê, Ayun Pa, Đak Pơ, Phú Thiện, Krông Pa, Đức Cơ, Chư Sê, Đak Đoa păng Kbang.

Lơ̆m tơdrong tơlĕch jang, rim tơring ƀơm lơ tơnap tap gah hăt hot khei năr, ưh đei bơngai jang, kơjă tơmam ming man tŏk kăp. Mă lei, gơnơm hơvơn đei khul linh păng khul jang tơ̆ tơring, tơdrong jang adoi oei trŏ nhen tơchơ̆t tơlĕch. Blŭng pơyan 'mi sơnăm ou, hloh 6.000 unh hnam hin dơnuh, tơjê̆ hin dơnuh, unh hnam mă teh đak tơchơ̆t tơgŭm hlôi đei hnam oei kơjăp sơđơ̆ng, ưh đei huach lơ kon jên.