Đơ̆ng rŏng hloh mơjĭt sơnăm tơlĕch jang kiơ̆, hlôi đei vă jê̆ 570.000 ‘nu bơngai jang ‘noh bơngai kon kông đei sơng iŏk kon jên tơgŭm djru akŏp hloh 1.270 ti hlak jên. Dôm trong jang tơgŭm ou tơgop pơjing đei tơdrong jang sơđơ̆ng, pơm hơtŏk bơngai jang hơgei păng pơtrŭt kơtang atŏk tơ iung mŭk drăm-tơpôl. Mă lei, kiơ̆ yan ou tơlĕch jang kiơ̆ jei đei ƀôh tim mă gan ‘lơ̆ng hơ iă: tơdrong pơlăp jang kiơ̆ tim mă lơ; kon jên tơgŭm ăn oei tŏ sĕt; jơ ‘năr kơđeh; pơm hla bơar mơmat tat pơm ăn hơnih mơdro sa tơnap mă sơng iŏk đei tơdrong tơgŭm djru ou ... Tơ̆ hop akŏm, rim bơngai tang măt hlôi pơma tơgop tơpăt vă pơm pơkeh trong jang tơgŭm djru kiơ̆ trong tơpă păng jơnei hloh dơ̆ng. Hop akom jing trong kăl hloh tơgop pơm pơkeh trong vă pơjing hơmet ming rim Tơdrong tơchơ̆t vă pơtruh ăn Thủ tướng Teh đak lăng hơlen, tơ iung pơjing trong jang ‘lơ̆ng hơ iă, trŏ lăp hloh, pơjing hơyak pran đunh đai ăn hơnih mơdro sa ŭnh hnam pơm tơm kơdih lơ̆m tơmơ̆t păng atŏk tơ iung khul jang tơring kon kông păng groi kông lơ̆m chăl hle.