Jê̆ 3 tŏ trong tơklăh ƀât hơtuch plei Trum, xăh Tâm Thắng, apŭng Cư Jút, jĭ hnam ‘nao man xă 90m² kơjăp ‘lơ̆ng kơ ƀok Y Tem Kpơr. Lơ̆m pơgar hnam, ‘long chĕh phe jing ‘lơ̆ng ƀlĭk, oei kơ tĕn plei. Ƀok Y Tem tơroi, unh hnam ƀok sơ̆ mơmat tat hlŏh lơ̆m pơlei, hăm 7 ‘nu bơngai, arih xa gơnơm đơ̆ng 1,2 sao cheh phe păng chă jang ăn kơ đe đĕch. Gơnơm tơdrong jang tơm kơ teh đak găh tơjur tơnuh hin, tơdrong jang xa păng arih xa kơ unh hnam đei tơplih rim năr. Đơ̆ng blŭng sơnăm 2022 truh dang ei, unh hnam ƀok hơnơ̆ng đei ƀơk ăn rơmo yŏng, tơgŭm pơtăm ming cheh phe păng ‘nao hlŏh jĭ tơgŭm man hnam oei.

Đĭ đăng jing jơhngâm hưch hanh vă unh hnam ƀok Y Tem adrin jang tŏk: “Adrol kơ đei tơdrong tơgŭm đơ̆ng teh đak, tơdrong arih xa kơ unh hnam nhôn tôch pơmat tat, oei xa lơ̆m hnam tơ̆r so sŏch. Dang ei klăih đơ̆ng tơnuh hin, hnam nhôn đei tơgŭm rơmo yŏng 20 triu păng 70 triu hlak jên vă man hnam, dang ei ưh pă hli ‘mi kial kiơ bơih, tơdrong arih xa đĭ hơđơ̆ng bơih. Inh oei adrin rong rơmo vă rơmo su kon păng vei rong chĕh phe hai, unh hnam nhôn đĭ klăih đơ̆ng tơnuh hin bơih. Inh bơnê kơ Đảng păng teh đak tôch lơ”.

Hơtăih kơ plei Trum ưh đei dang yơ, plei Ea Pô kŭm oei tơplih ‘nao rim năr gơnơm đơ̆ng dôm tơdrong tơgŭm jang tơjur tơnuh hin. Yă H’Buan Kbuôr, bơngai Rađe, unh hnam tơnuh hlŏh lơ̆m pơlei, gơnơm đei tơgŭm ăn rơmo yŏng păng 70 triu hlak jên vă man hnam, kŭm hăm đon adrin đơ̆ng unh hnam, yă gơ̆h đei hnam oei kơjăp ‘lơ̆ng, arih xa roi sơđơ̆ng. Hnam ‘nao man đang, rơmo kŭm kieu bơih, tơdrong adrin tŏk klaiwh đơ̆ng tơnuh hin kŭm pơtơm đei gơnơm đơ̆ng dôm tơdrong tơgŭm tôch đei yoa đơ̆ng Đảng, Teh đak.

Yă H’Buan chơt hơiă pơma: “Hnam nhôn đei 4 sao teh păng thuê dơ̆ng 2 sao ‘nŏh jing 6 sao, yoa ưh băt trong jang xa kơna lăp jang đei dang 40 triu đĕch. Adrol ki, unh hnam tôch pơmat tat mă lei đei teh đak tơgŭm man ăn hnam, dang ei tơdrong arih xa hiôk sơđơ̆ng ƀiơ̆ bơih. Inh bơnê tôch kơ lơ”.

Tâm Thắng jĭ xăh jang chŭn mir, hơtăih kơ tơring kơdrâm dêh char Đắk Nông dang 110 km, đei 15 pơlei hăm 1/3 kơsô̆ kon pơlei ‘nŏh jĭ bơngai kon kông. Ƀok Trần Thế Quang - Bí thư Đảng xăh ăn tơbăt, đơ̆ng 2021-2025, xăh đei tơlĕch ăn vă jê̆ 3 ti hlak jên đơ̆ng tơdrong jang tơjur tơnuh hin vă tơgŭm ăn dôm bơngai pơmat tat găh hnam oei, tơgŭm bơ̆n kon yŏng, tơmam choh jang. Gơnơm đơ̆ng noh, kơsô̆ unh hnam tơnuh jur đơ̆ng 5,3% pă 1,9%, vang tơgop tơgŭm ăn xăh jang đang tơdrong pơjing tơring tơrang ‘nao sơnăm 2024 păng jing tơring jang ‘lơ̆ng tơdrong tơjur tơnuh hin tơ̆ tơring hơtăih yăih kơ dêh char.

Ƀok Trần Thế Quang tơroi truh 1,2 tơdrong kăl mưh bơ̆ jang đơ̆ng rŏng kơ iŏk đei jên tơgŭm vă tơjur tơnuh hin đơ̆ng Trung ương ăn tơring: “Lơ̆m khei ‘năr tơlĕch jang, nhôn hơnơ̆ng năng kăl hơnăp jang đơ̆ng tơpôl kon pơlei păng tơdrong vang jang đơ̆ng kon pơlei đei xa yoa dôm tơdrong tơgŭm. Kiơ̆ đơ̆ng noh, đơ̆ng rŏng iŏk đei jên tơgŭm đơ̆ng teh đak, tơmât yoa trŏ hăm tơdrong jang, đei yoa ‘lơ̆ng. Hơdai hăm ‘nŏh, nhôn oei hơtŏk hơnăp jang dăr lăng đơ̆ng mặt trận păng khul tơpôl vă pơm ‘lơ̆ng ăn tơdrong tơlĕch jang tơdrong jang tơm huei kơ hiong huach jên kư̆ kă, athei jang đei tơdrong đei yoa ‘lơ̆ng tơ̆ yăn âu.”

Tơdrong jang tơm kơ teh đak atŏk tơiung mŭk drăm, tơpôl tơ̆ tơring kon kông păng groi kông đơ̆ng 2021-2025, đei tơlĕch jang tơ̆ apŭng Cư Jút, hơnhăk ba lơ tơdrong 'lơ̆ng. Kơhrĕng unh hnam kon pơlei kon kông đei tơgŭm tơtom găh teh oei, teh choh jang xa, đak nhă, hnam oei, tơdrong jang xa... Hăm vă jê̆ 40 ti hlak jên đei tơlĕch, Cư Jút jĭ apŭng bơ̆ jang đei yoa ‘lơ̆ng hlŏh, vang tơgop ăn lơ xăh jang kĕh tơdrong pơjing tơring tơrang ‘nao.

Kiơ̆ ƀok Trần Mai Việt-Phŏ Kơdră vei lăng Hơdrĕch kon kông păng tơdrong lui khop apŭng Cư Jút, Tơdrong jang tơm kơ teh đak găh tơjur tơnuh hin gô hơnhăk ba tơdrong đei yoa ‘lơ̆ng hlŏh dơ̆ng, mưh khul kơdră pơgơ̆r tơring 2 tăl đei bơ̆ jang. Tơ̆ xăh gô iŏk vei lăng, tơlĕch jên, veh ver tơdrong tơlĕch jên jang răh rai: “Adrol sơ̆ đei truh 10 tơdrong jang, klăih song ăn lơ anih jang, ƀônh tơlĕch jên răh rai, tôch pơmat vă vei lăng păng pơgơ̆r jang ưh đei hrơ̆ch ‘lơ̆ng. Truh âu kơnh akŏm ăn 1 anih vei lăng ‘nŏh sư hiôk hian ƀiơ̆ mưh bơ̆ jang. Mă loi, athei pơjao tơpăt ăn xăh tơlĕch jang, vă kon pơlei đei xa yoa, ưh đei hơdrom băl nhen adrol ki, iŏk jang ƀônh hai, đei yoa ‘lơ̆ng ƀiơ̆ hai.”

Mă tơpă ăn ƀôh, Tơdrong jang tơm kơ teh đak găh atŏk tơiung mŭk drăm, tơpôl tơ̆ tơring kon kông păng groi kông tơ̆ apŭng Cư Jút hlôi păng tŏk bŏk hơnhăk ăn tơdrong đei yoa ‘lơ̆ng, ƀơm truh lơ kon pơlei kon kông oei pơmat tat. ‘Nâu jĭ trong jang tôch đei yoa, trŏ ƀlep, tơgop gĭt kăl ăn tơdrong jang tŏk mŭk drăm-tơpôl păng sut pơđĭ pơngot, tơjur tơnuh hin tơ̆ Đắk Nông. Mưh khul kơdră chĕp kơ̆l tơring 2 tăl đei pơjing đang păng bơ̆ jang kơnh, tơdrong tơlĕch jang tơdrong ‘nâu kăl đei akŏm 1 jơhngâm vă gơ̆h đei yoa ‘lơ̆ng, lăp hăm tơdrong ‘mĕh vă đơ̆ng tơring.