Kiơ̆ trong vă jang hơmet ming hơnih jang dêh char sơnăm 2025, lơ̆m teh đak đei 34 dêh char, pơlei tơm, ‘noh đei 6 pơlei tơm găh Trung ương păng 28 dêh char. Akŏp măt bơngai kang ƀô̆ đơ̆ng rŏntg hơmet pơ ‘lơ̆ng ‘noh hloh 447.000 ‘nu; Akŏp hơnih bơ̆ jang teh đak ‘noh hloh 38.000 hơnih bơ̆ jang; hơnơ̆ng iŏk yua vă jê̆ 34.000, rơkăh hloh 4.000 hơnih bơ̆ jang. 

Pơma dơnuh tơ̆ khul găh Tơdrong vă jang ou, rim kơdră tang măt drơ̆ng nơ̆r hăm rim trong jang hơmet ming rim dêh char, pơlei tơm găh Trung ương sơnăm 2025 păng akhan, rim trong jang hơmet ming hơnih jang dêh char kơ yuơ Khul kơdră Teh đak tơlĕch ăn hlôi trŏ lăp hăm rim trong chĕp pơgơ̆r, pơtho tơbăt đơ̆ng Kơdră kơpal. Bơngai tang măt Dương Khắc Mai, khul Dak Nông sơkơ̆t hơdăh, hơgrop dêh char ‘noh jing tơdrong tơchơ̆t gĭt kăl hloh. Mă lei mă kăl ‘noh đơ̆ng rŏng hơgrop, rim tơring gô pơprŏ ăn kang ƀô̆, bơngai jang păng xek tơlang hơnih jang rơkăh ‘noh lơ liơ:“Tơdrong kăl hloh ‘noh lăp đơ̆ng rŏng hơgrop bơ̆n gơ̆t jang hăm dôm kang ƀô̆ gơh hơgei. Mă ƀar, găh hơnih jang kăl vei lăng kơjăp, adoi ‘nĕ kơlê̆ chă hư răm, kăl đei trong trŏ lăp vă tơplih iok yoa dôm hơnih jang ou”.

Kiơ̆ đơ̆ng Kơdră tang măt Trần Hoàng Ngân, khul Pơlei tơm HCM, hơgrop dêh char, gô tơgŭm ăn rim tơring hơmet pơ ‘lơ̆ng dơ̆ng tơdrong atŏk tơ iung. Kiơ̆ kơ ƀok, vă rim dêh char, pơlei tơm jang kiơ̆ ‘lơ̆ng dôm tơdrong đei, bơ̆ jang jơnei đơ̆ng rŏng hơgrop, ‘noh:“Pơm lơ liơ rim tơring lơ̆m dêh char kăl iung jang tơgoăt dih băl kơjăp, sơđơ̆ng ăn ưh kơ hơdrô̆ găh trong nơnăm mă lei pơđĭ găh tơdrong jang kmăi kmŏk kơsô̆. Lơ̆m ou kăl đei khul jang, mă khul jang kăl hlŏh ‘noh găh kon jên hu. Kơna ĭnh oei hơnơ̆ng chă apĭnh athei mưh lăng hơlen Khôi luơ̆t găh kon jên jang teh đak, ‘noh găh khul groi teh jăl jang 5 sơnăm 2016-2030 bơ̆n kăl ‘măn ăn rim dêh char pơlei tơm vă rim dêh char pơlei tơm đei rơvơn tơmơ̆t jên jang lơ̆m tơdrong jang ou”.

Kơ iĕng  Thủ tướng Teh đak Nguyễn Hòa Bình sơkơ̆t hơdăh, tơdrong hơmet ming hơnih jang dêh char ‘măng mă ou jĭ tơdrong jang gĭt kăl gơh hơgei hloh găh hơmet ming hơnih jang păng khul bơngai jang. Tơdrong tơm ‘noh tơ iung pơjing hơmet ming trŏ lăp păng atŏk tơ iung mŭk drăm kĕ pran kơtang, atŭm hăm dôm tơdrong đei kơ rim tơring tơrang, truh hloi tơring groi kông adoi nhen tơring tơmăn đak dơsĭ. Tơchĕng hơlou, năr 30/6, đĭ đăng tơring gô tơbăt hơdăh hơgăt teh ‘nao kơ dêh char, tơring, atŭm hăm khul kơdră chĕp pơgơ̆r ‘nao pơđĭ găh tơdrong jang Đảng păng Khul kơdră chĕp pơgơ̆r tơring. Pơgê năr 30/6, rim kơchư̆k kơdră jang lơ̆m dêh char, lơ̆m tơring gô đei tơroi tơbăt hơdăh, păng đơ̆ng năr 1/7, khul kơdră ‘nao kơ dêh char păng tơring gô iung jang.

Găh kiơ̆ đơ̆ng Kơdră chĕp pơgơ̆r Hơnih tơm Nô̆i vŭ Phạm Thị Thanh Trà, tơdrong hơmet ming đei hơlen tôch kơtang đơ̆ng hơgăt groi teh, găh măt bơngai kon pơlei truh tơdrong chăl sơnăm, tơdrong oei sa, hơdrĕch hơdrung, tơdrong lui khop, trong atŏk tơ iung păng jơhngơ̆m đon tơpôl:“Hơmet ming rim hơnih jang dêh char ‘moi kiơ̆ groi teh lăng truh đak dơsĭ păng tơgĕch đei tơdrong rơvơn muk drăm đak dơsĭ păng tơdrong rơvơn vang mơ̆t hơdoi. Hơnih tơm Chinh trĭ, Khul kơdră chĕp pơgơ̆r Trung ương, mă kăl ‘noh khul kơdră chĕp pơgơ̆r teh đak jei hlôi hơmet ăn đĭ đăng rim tơdrong rơvơn, mă lei tơdrong gĭt kăl hloh ‘noh rim tơring jang kiơ̆ hơmet ming, hơgrop dih băl, tơlĕch jang rim tơdrong pơkoel vă jang kiơ̆ trong jang khul kơdră ƀar kâp tôch hơdrin”.

Lơ loh, tơdrong hơmet ming rim hơnih bơ̆ jang dêh char ‘măng mă ou ưh khan lăp hơyak gĭt kăl lơ̆m pơm kơtoei khul jang, iung jang kơjăp ‘lơ̆ng, mă oei pơih trong ăn atŏk tơ iung ‘nao, pơjing đei jơhngơm pran atŏk tơ iung mŭk drăm-tơpôl rim tơring. Hăm tơdrong hơmet ăn tôch hơlen đơ̆ng Trung ương truh tơ̆ tơring, tơdrong lăp mĭnh nơ̆r ƀơ̆r đon đơ̆ng rim hơnih păng kon pơlei pơla, bơ̆ jang hơgrop, hơmet ming hơnih bơ̆ jang dêh char sơnăm 2025 gô pơjing đei hơyak ‘nao ăn teh đak, trŏ lăp hăm tơdrong pơkoel atŏk tơ iung kơjăp ‘lơ̆ng păng vang mơ̆t hơdoi kơtang lang să lơ̆m chăl hle.