Tơdroăng pơhlêh nếo túa tơmiât pêi pơkuâ ngăn, séa ngăn krá tơniăn pơkeăng xôh kơdê oâ hdrong roê ‘mot ƀă thăm mơnhông tơdroăng tơrŭm tung mâu túa pơkâ kơnía châ ngăn cho troăng pơkâ ki kal vâ tŏng gum xơpá ƀă tơmiât troh tơdroăng mơnhông krá tơniăn ton dêi kơvâ sầu riêng – môi kơvâ cheăng tê plâi ngi kong têa ê “rơtal dollars”. Kố cho rơkong tơpui châ mâu kăn mơ’no tối a rôh hôp 'no tơdrêng ing troăng hyôh internet tơkŭm po a hâi lơ 10/6 a Hà Nội, ƀă tơdroăng veăng ai mâ dêi mâu kăn teăng mâ mâu khu xiâm, Khu tơrŭm Kơchâi plâi Việt Nam, mâu khu ki rơkê plĕng ‘na pêi chiâk deăng, khu mơdró kâ tê tơmeăm ngi kong têa ê ƀă mâu khu ki pêi kơdrum pêt sầu riêng a mâu tíu mơ’no a Cần Thơ, Dak Lak ƀă Tiền Giang.

Mâu kăn tối nhên sầu riêng hiăng chiâng môi tung mâu kơvâ cheăng xiâm, hnoăng cheăng kân tung kơxô̆ liăn châ xo liăn ing tê plâi ngi kong têa ê dêi Việt Nam. Laga, pakĭng rôh tơ’lêi hlâu kân xuân ai mâu tơdroăng pơloăng mơnúa ôh tá kŭn. Pơkâ thế xơpá dêi kơchô tê mơdró ‘na ki dâi lĕm dêi plâi, tăng ‘nâi xiâm kối, mah kơxô̆ kơpong pêt; tơdroăng ki ôh tá tơrŭm tung túa pơkâ kơnía; tơdroăng ki pêt hên; mơni kô tro pơreăng kâ ‘nhiê, kong prâi pro pơhlêh; ƀă tơdroăng tơkôm tung mâu kơchơ tê mơdró cho mâu tơdroăng kal châ tŏng gum teăm tơdrêng.

Tiô mâu khu ki rơkê plĕng, kal tơbleăng tơdrêng mâu troăng hơlâ, tung mê tối nhên troh tơdroăng pơưhlêh túa tơmiât pơkuâ ngăn. Tơdroăng mơjiâng troăng hbrâ mơdât sap ing tơdroăng ki roê xo troh tê kô cho tơdroăng xiâm vâ xo tơdroăng loi dêi kuăn pơlê ki roê kâ ƀă pro ivá ăm mơnhông krá tơniăn dêi kơvâ.