Ing khế 6 hơnăm 2023, Khu ngăn ‘na Rak vế hdrê loăng, ối tung Khu xiâm ngăn ‘na Chiâk deăng ƀă Mơnhông thôn pơlê, nôkố cho khu xiâm ngăn’na Chiâk deăng ƀă Hyôh kong prâi tơrŭm po hneăng hôp, tơpui tơno ‘na kơphế tung lâp plâi tơnêi vâ mơnhên tối ki ai tơdjâk dêi tơdroăng pêt tơvât hdrê loăng ki ê tung kơdrum kơphế, tơdjâk troh ôa hdrong ki kâ ‘nhiê ƀă tơdroăng ki ki ai pơxúa dêi pơkeăng ki rak vế hdrê loăng ƀă tơdroăng pôu râng hnoăng cheăng vâ mơnhông pêt kơphế klrá tơniăn a mâu kong pơlê kơpong Tây Nguyên.

Tung mê, seá mơnhên ngăn, lăm hlo, thăm mơdêk tơdroăng ki pơkuâ ngăn ƀă hbrâ mơdât oâ hdrong kâ ‘nhiê, gum ăm kuăn ƀô̆ ƀă kuăn pơlê ki pêt kơphế tơ’lêi hlâu tung tơdroăng cheăng; thăm mơdêk ivá ki lăm ngăn, mơnhên hnoăng cheăng mâu kăn ƀô̆ rak ngăn hdrê loăng; klêi mê, gum ăm kuăn pơlê thăm rế hlê plĕng ƀă pôu râng dêi hnoăng cheăng ki rak vế hyôh kong prâi, hdrê loăng ăm mâu khu ki mơjiâng pro ƀă tê mơdró pơkeăng kơdê oâ hdrong bă rak vế hdrê loăng a Tây Nguyên.

Tiô Ngế ngăn ‘na pêi pêt ƀă Rak ngế hdrê loăng tối ăm ‘nâi, túa ki pêt tơvât ƀă hdrê kơphế ƀă kơxái tiu, plâi sầu riêng dế nôkố, kuăn pơlê mâu kong pơlê kơpong Tây Nguyên dế xúa mâu tơnêi tíu, chiâk deăng ƀă khŏm pêi lo liăn ngân hên. Tuá cheăng kố ăm hlo ki tơƀrê tung tơdroăng pro pơxúa nhên ‘nâng, kơdroh oâ hdrong kâ ‘nhê ƀă thăm rak vế hdrê loăng thăm rế dâi ngiât lĕm. Maluâ tiah mê, a hên pơlê cheăm, vâi krâ-nhŏng o xuân ối hmâ pêt to loăng kơphế, xua mê khoh chiâng ai hên oâ hdrong châ kâ loăng kơphế. Ƀă mâu kơdrum deăng ki pêt tơvât ƀă hdrê loăng ki ê, hên ngế ki pêi ôh tá hâi ‘nâi xúa pơkeăng vâ rak vế hdrê loăng ăm ga i tơtro. Pôa Nguyễn Qúy Dương, Phŏ kăn hnê ngăn pêi pêt ƀă rak ngăn hdrê loăng tối tiah kố, tơdroăng kố kal athế pêi pro thâ vâ khoh châ rak ki dâi lĕm dêi hdrê loăng plâi:

“Xuân u ối hên vâi krâ-nhŏng o kuăn pơlê ta hâi hlê plĕng nhên ‘na tơdroăng xúa pơkeăng, ki rơhêng vâ tối tung pơla pêt tơvât hdrê loăng tiah mê, mê athế xúa pơkeăng ăm ga ti lâi vâ khoh châ pơxúa, châ tơƀrê tung tơdroăng khŏm châ mơdât oâ hdrong  hmâ lo kâ ‘nhê, ƀă xuân châ rak ki dâi lĕm dêi loăng pêt mơjiâng plâi ing tơdroăng pêt tơvât mê. Kố cho môi tơdroăng ki dế  ối trâm pá hên tung pơla vâ pơhlêh túa pêi pêt loăng kơphế krá tơniăn ton”.

Tiô tơdroăng lăm ngăn mơnhên dêi Khu ngăn ‘na rak vế hdrê loăng a 3 kong pơlê Kon Tum, Dak Lak ƀă Lâm Đồng ăm hlo, pơkeăng hoă hok xuân ối châ xúa hên tung tơdroăng ki kơdê oâ hdrong, tung pơla mê, mâu túa ki xúa phon hlá nhâ ƀă kih thuât pêi pêt nếo bu xiâm pêi tiô khôi hmâ. Ing mê, kô tơ’lêi ai tơdroăng ki xúa pơkeăng lối hên a loăng kơphế, kơxái tiu, plâi sầu riêng xuân ối cho tơdroăng ki tô tuăn hên, pơtối kal ai tơdroăng ki rak ngăn, pêi pro i tơtro tâ.

Vâ pơhlêh túa cheăng kố, pôa Phạm Quang Trung, Kăn teăng mâ khu Tơpui tơno ‘na Kơphế Lâp plâi tơnêi a Việt Nam tối, tơdroăng tơkêa mê kô pơtối rơtế ƀă mâu kơ koan ki ai tơdjâk tung tơnêi têa thăm mơdêk tơdroăng ki mơjiâng khu ki hnê tối ‘na kih thuât ăm ga i tơtro tâ ƀă mâu tơdroăng pơkâ dêi lâp plâi tơnêi. Gum ăm kơvâ pêi pêt, rak ngăn hdrê loăng kơphế Tây Nguyên rế hía rế tơ’lêi châ mot trâu rơdâ tung khu ki pêi pêt tơmeăm ki tơxâng dêi lâp plâi tơnêi, mơdêk ivá ki tơbriât tê mơdró ƀă mơnhông krá tơniăn.

“Vâ khoh hnê mơjiâng ƀă thăm mơdêk tuăn i hiâm rế hlê plĕng dêi kuăn pơlê mê pin kal athế mơnhên ngăn i nhên khât, ai mâu tơdroăng hriăn plĕng vâ mơ’no mâu troăng hơlâ vâ ga tơtro ƀă tơdroăng ki dế ai khât nôkố. Tí tăng séa ngăn, mơnhên hlo ƀă ‘mâi rơnêu mâu tơdroăng ki chêh tối tung kơxop hlá mơ-éa ăm ga i tơtro ƀă tơdroăng pơkâ ki nếo. Ing mê ah, tơkŭm po mâu lâm hnê mơhno, po rơdâ ăm vâi krâ-nhŏng o kuăn pơlê vâ châ hlê plĕng mâu tơdroăng ki pơkal thế pêi pro nếo, tơtro ƀă tơdroăng pơkâ dêi lâp plâi tơnêi”.