Kuăn pơlê pêi chiâk deăng kong pơlê Gia Lai dế pơxiâm rơnó krí plâi sầu riêng 2025. Mơhé ai hên tơdroăng ‘na pá puât tê ngi kong têa ê, la kơnôm tơniăn ki dâi lĕm, mâu khu ki pêt plâi sầu riêng a kong pơlê Gia Lai xuân tê châ yă hôm há sap ing 55 rơpâu troh 70 rơpâu liăn/kilô tiô khu, cho tơdroăng ki tro ăm môi rơnó plâi sầu riêng ƀlêi trâng.

Nôkố, lâp kong pơlê Gia Lai ai dâng 8.200 ha plâi sầu riêng, tơkŭm a mâu tơring môi tiah Ia Grai, Chư Sê, Chư Pưh, Đak Đoa, ‘Mang Yang, Chư Prông, Đức Cơ... Pêi lo châ dâng 14,8 tâ̆n/ha, ƀă mâu kơdrum châ rak ngăn lĕm mê kô châ sap ing 20 troh 30 tâ̆n/ha. Tung kơxô̆ mê, dâng 5.000 ha dế tung hneăng tê mơdró, tiô tối hdrối kơxô̆ plâi lâp kong pơlê châ 75 rơpâu tâ̆n.

Ki rơhêng vâ tối, Gia Lai hiăng châ ăm 54 mah kơxô̆ kơpong pêt ƀă tâi tâng ƀăng deăng 1.281ha, kum plâi sầu riêng kong pơlê tê ngi hên kong têa kân môi tia Sinuâ, Mih, New Zealand ƀă Úc. Troh hơnăm 2030, kong pơlê mơnhên troăng po rơdâ ƀăng plâi sầu riêng tâk 10 rơpâu ha, ƀă pơkâ mơjiâng mah kơpong pêt ăm rêm 10 ha ƀă xúa ki pơkâ tơtro GlobalGAP vâ tơxâng pơkâ tê ngi kong têa ê.