Tiô tối tơbleăng dêi Vi ƀan kuăn pơlê kong pơlê Dak Lak, mâu khế apoăng hơnăm, pêi chiâk, tê mơdró ƀă ôm hyô ai rôh mơnhông tơƀrê. Kơxô̆ tơmối troh ôm hyô tâk  hên. Kơxô̆ tơmối ôm hyô tâk luâ tơdế tâng vâ pơchông ƀă hơnăm hdrối. Tíu ki eăng má môi cho liăn ngân lối 5.000 rơtal liăn, tâk lối 35% tâng vâ pơchông ƀă hơnăm hdrối.

Laga, pakĭng mâu tơdroăng châ tơƀrê, kong pơlê Dak Lak xuân dé trâm pá ƀă tơdroăng xơpá. Pôa Nguyễn Thiên Văn, Kăn hnê ngăn Vi ƀan kuăn pơlê dêi kong pơlê Dak Lak ki pơtân pơkâ thế mâu cheăm tơring ki ai liăn ‘no mơjiâng tơmeăm khoăng tơnêi têa, la ngiâ thế pê klêi mâu tơdroăng pơkâ mơnhông - cheăng kâ dêi hơnăm 2025.

“’Na um kơchuâ tâi tâng cho tơniăn, la xo liăn ngân ODA ôh tá tơniăn, pin ngăn tơdrăng ƀă pro ti lâi mơdêk kơxô̆ liăn ODA. ‘Na xo liăn ngân nâp ăm hngêi rak liăn tơdroăng pêi pro ki tro liăn ngân râ kong pơlê cho 1.140 rơtal liăn, ƀă râ tơring pêi pro 1.600 rơtal liăn. Sap nôkố ta troh mơ’nui hơnăm, râ kong pơlê ối 600 rơtal nếo, ‘na râ tơring thế pêi 700 rơtal liăn nếo mê nếo pêi ai tiô pơkâ tơbleăng. Ƀă râ tơring kô tơniăn, krê ƀă râ tơring, drêng pơ’lêh  hnoăng cheăng vêh troh a cheăm mê ôh tá tơ’lêi klâi vâ xo. Tơdroăng mê mâu kăn thế tơmiât ngăn nhên hdrối”.

A rôh hôp Khu kăn  pêi cheăng Đảng ƀô̆ kong pơlê Dak Lak roh má 33, po rơdâ, mâu kăn hiăng tơpui tơno, ăm hnê tối hên tơdroăng ki kal tung hbrâ ăm hneăng hôp mâu kăn Đảng ƀô̆ kong pơlê rôh má 18, hneăng hơnăm 2025-2030. Tiô tối tơbleăng Kal kí pơtroh ăm hneăng hôp Đảng ƀô̆ kong pơlê hneăng ki nếo la ngiâ, kong pơlê Dak Lak nếo pơkâ 17 tơdroăng pơkâ ki hên a mâu kơvâ cheăng kâ, mơhno túa lĕm tro - pơlê pơla, hyôh kong prâi, ‘na cheăng lêng - kring tơniăn ƀă mơjiâng Đảng. Hlối ‘nâi nhên 5 khu tơdroăng cheăng, troăng hơlâ ki hên cho tơdroăng pêi tơbrê vâ pê klêi pơkâ rĕng, krá kak.

Hneăng hôp xuân tơkŭm tơpui tơno môi tuăn ƀă tơdroăng hôp tơpui tơno Tơdroăng tơkêa bro mơjiâng Đảng ƀô̆ kong pơlê Dak Lak ing  tơrŭm má môi péa Đảng ƀô̆ kong pơlê Dak Lak ƀă Phú Yên. Ing mê, klêi pro rế lĕm, lâp tung kong pơlê Dak Lak (ki nếo) kô ai 108 khu tơrŭm cheăng Đảng cho dêi Khu kăn Đảng kong pơlê, ƀă tâi tâng kơxô̆ mơngế vâ chê 140.000 ngế đảng viên.

Pôa Nguyễn Đình Trung, kăn hnê ngăn Đảng kong pơlê Dak Lak pơkâ thế tung pơla mơjiâng tơdroăng chêh hlá mơ-éa, rêm râ, kơvâ cheăng, kong pơlê kal pơtối tăng ‘nâi plĕng, veăng hnê tối ‘na tơdroăng pơkâ hneăng hôp ƀă tơdroăng tơkêa bro ki kal. Tung mê, tơdroăng tí tăng ‘nâi plĕng, pơtối rak vế ai pơxúa dêi péa kong pơlê Dak Lak ƀă Phú Yên klêi tơ’mot thế rơtế ƀă tơdroăng pơkâ mơnhông tâi tâng tŭm tơdroăng:

“Tăng ‘nâi plĕng vâ hlối pơtối rak ki pơxúa dêi kong pơlê Dak Lak ton ƀă kong pơlê Phú Yên ton, péa nếo thế ai tiô púi vâ tŭm mâu tơdroăng cheăng ki kal dêi 2 kong pơlêoh tá tá xê to pêi chiâk cheăng luâ râ xuân ôh tá chiâng ôh há, tơdroăng rêh ối pơlê pơla  cheăng lêng kring tơniăn, pơtối rak túa lĕm tro thế tơtrŏng khât. ‘Na ki tơƀrê dêi kăn ƀô̆, pin thế pơ’lêh mê nếo châ tơƀrê, ƀă pơkâ dêi Tíu xiâm, dêi kuăn pơlê la xuân túa pêi cheăng tiah ton mê kô ôh tá la lâi kâi pơ’lêh, tá kâi tơƀrê. Hơnăm 2025 rah xing xoăng pro rế lĕm mâu ngế pêi cheăng ăm tơnêi têa cho môi tơdroăng pơ’lêh nếo la krê kong pơlê Dak Lak xing xoăng pro rế lĕm kăn ƀô̆ xuân cho môi tơdroăng pơ’lêh nếo”.