Đơ̆ng rŏng hloh 1 giĕng pơm jang kiơ̆ pơkăp tơmơ̆t hơdai, tơdrong jang pơm hla bar hanh chinh kơ dôm xah, phương lơ̆m dêh char Lâm Đồng đei pơm jang 'lơ̆ng tơnăp ăn kon pơlei. Atŭm hăm 16 hơnih jang tơ̆ dêh char, tôm 124 xah, phương, anih jang tơm kơ dêh char Lâm Đồng adoi đei pơm jang vă pơm hla bar hanh chinh, iŏk yua phân mêm vei lăng hla bar 'nao, pơtrŏ hăm tơdrong kăl răk vei păng pơm hô sơ ăn kon pơlei.

Kiơ̆ Anih jang Nô̆i vŭ dêh char Lâm Đồng, jô̆ đơ̆ng năr 1/7, rim năr adoi đei hloh 1.000 hô sơ tơmơ̆t kơtă păng trư̆k tuyê̆n tơ̆ dôm anih jang vă gô đei pơm. Lâm Đồng đei lăng jĭ minh lơ̆m khul 5 tơring chĕp kơ̆l kơ jơ̆p teh đak lơ̆m tơdrong sơng, pơm hla bar hanh chinh lơ̆m dôm năr blŭng pơm jang kiơ̆ pơkăp jơnŭm pơgơ̆r 2 tăl.