Đơ̆ng rŏng hlŏh 1 giĕng tơlĕch jang kiơ̆ trong Khul kơdră pơgơ̆r tơring 2 tăl tơ̆ dôm anih vei lăng ‘nao, kơsơ̆ (8/7), Kơdră Anih vei lăng kon pơlei dêh char Đắk Lắk Tạ Anh Tuấn hlôi truh dăr lăng tơ̆yăn âu găh tơdrong bơ̆ jang tơ̆ xăh Krông Năng păng phường Buôn Hồ. Kơdră vei lăng kon pơlei dêh char Đắk Lắk Tạ Anh Tuấn tơchĕng ‘lơ̆ng tơdrong adrin đơ̆ng Anih chĕp kơ̆l đảng, khul kơdră pơgơ̆r xăh Krông Năng păng phường Buôn Hồ hlôi pơm hơtŏk tơdrong đei yoa mưh vei lăng teh đak, pơvih ăb kon pơlei roi ‘lơ̆ng biơ̆.

Kiơ̆ đơ̆ng chă hơlen năng, Kơdră vei lăng kon pơlei dêh char Đắk Lắk chih iŏk 1,2 tơdrong pơmat tat, tơhlăk tăk tơ̆ tơring nhen: tơdrong tơlĕch jên jang hiơ̆ pơm ưh ‘lơ̆ng truh tơdrong kla jên tơgŭm; kơmăy phần mềm pơm hla ar ƀât lăp oei hư, ưh đei mang; trong pơtho tơƀôh tơlĕch jên jang ăn xăh, phường tam mă hơdăh. Ƀok Tuấn pơlung khul kăn ƀô̆ tơ̆ Krông Năng păng Buôn Hồ hơtŏk đon jang tơnăp, mĭnh jơhngâm, khŏm yak hlŏh pơmat tat, bơ̆ jang ‘lơ̆ng hơnăp jang, tơdrong jang hlôi đei pơjao.