Kiơ̆ Anih vei lăng kon pơlei dêh char Gia Lai, lơ̆m 1 puăt blŭng sơnăm 2025, akŏm đĭ đăng tơmam jang đei tơ̆ dêh char (GRDP) tŏk vă jê̆ 7,5%. ‘Nâu jĭ kơsô̆ tôch hơiă, mă loi ƀât mă dêh char ‘nao đei tơmât hơdai anih vei lăng, kăl đei jơ năr vă pơm sơđơ̆ng khul kơdră pơgơ̆r  păng trong vei lăng.

Găh jên thu mong, akŏm đĭ đăng jên thu mong ăn teh đak đei hlŏh 13.600 ti, tŏk lơ pơting hăm klhei âu sơnăm sơ̆. Kăl kơ năng ‘nŏh, tơdrong tơgop đơ̆ng Bình Định iŏk đei hlŏh 10.000 ti, oei Gia Lai so lăp đei 3.600 ti hlak jên. Jên tĕch tơmam tơ̆ teh đak đe đơ̆ng dêh char vă jê̆ 1,7 ti USD, tŏk tôch lơ. Hơdrô̆ Gia Lai (so) jên tĕch tơmam tơ̆ teh đak đe tŏk vă jê̆ 2 ‘măng, mă lơ ‘nŏh jĭ chĕh phe, pơjing jơhngâm pran ‘lơ̆ng ăn anih choh jang xa.

Tơdrong ‘lơ̆ng ăn Gia Lai ‘nao oei truh đơ̆ng lơ tơdrong jang tih nhen pơm trong gre kơdâu hrĕnh Quy Nhơn – Pleiku, tơnŏk đak dơsĭ Phù Mỹ păng trong gre păr jur tŏk kơsô̆ 2 tơ̆ cham gre păr Phù Cát. Dôm tơdrong jang ‘nâu ưh lăp tơgop gĭt kăl lơ̆m tơdrong jang atŏk tơiung mŭk drăm đĕch mă oei tơgop ‘lơ̆ng ăn trong nơnăm, logistics, sơng iŏk jên tơmât jang lơ̆m teh đak păng đơ̆ng teh đak đe. 

Mă lei, kiơ̆ ƀok Hồ Quốc Dũng, Bí thư Đảng dêh char Gia Lai, dêh char đơ̆ng rŏng kơ tơmât hơdai kŭm tơƀâp lơ tơdrong nol, ưh kơ ‘lơ̆ng. Tih hlŏh jĭ trong nơnăm, dơnâu đak, jang pơgang păng pơtho pơhrăm tam mă hrơ̆ch ‘lơ̆ng. Tơdrong pha ra băl găh trong vei lăng kŭm ƀơm ưh ‘lơ̆ng truh tơdrong đei yoa mưh chĕp kơ̆l pơgơ̆r đơ̆ng Gia Lai (‘nao) ‘năi. Vă hơmet pơ ‘lơ̆ng dôm tơdrong ưh kơlăp âu, dêh char Gia Lai hlôi tơlĕch tơdrong hơgăt bơ̆ jang ‘nao, iŏk trong jang “Rơđăh bơngai jang – Rơđăh tơdrong jang – Rơđăh tơmam jang đei – Rơđăh khei ‘năr ming man – Rơđăh hơnăp jang – Rơđăh tơdrong gơ̆h jang” pơm trong jang tơm. Kiơ̆ kơ ‘nŏh, tơdrong hơgăt jang tŏk mŭk drăm, tơpôl đei pơjao tôch rơđăh ăn rim xăh, phường, mă loi ‘nŏh pơ ‘nhŏ ăn dôm tơring pơmat tat. 

Ƀok Hồ Quốc Dũng pơma hơdăh: “Khŏm adrin vă sơnăm ‘nâu jang tŏk đei 8%. Hơlen năng rim tơdrong pơmat tat, tơhlăk tăk, dôm tơdrong ‘lơ̆ng vă pơm hiôk hian. Athei tơplih ‘nao mă brĕ đon tơchĕng, trong pơgơ̆r jang đơ̆ng vei lăng jing khul kơdră pơgơ̆r pơjing tơdrong hiôk hian, pơvih ăn kon pơlei, đĭ đăng dôm tơdrong đơ̆ng kon pơlei păng anih tĕch mơdro athei sek tơlang hloi tơ̆ tơring. Iŏk tơdrong đei yoa đơ̆ng tơdrong jang păng tơdrong lăp đon đơ̆ng kon pơlei vă hơlen năng tơdrong jang đei đơ̆ng kơ dih thoi yơ”

Anih vei lăng kon pơlei dêh char Gia Lai hlôi tơlĕch lơ trong jang tôch rơđăh vă hơmet pơ ‘lơ̆ng tơdrong vei lăng păng pơgơ̆r jang. Tơdrong tơm ‘nŏh hơtŏk tơdrong jang hăm kơmăy sô̆ păng điên tư lơ̆m rim anih vei lăng. Dôm tơdrong vei lăng păng hơgăt jang tŏk mŭk drăm tơpôl đei chih tơmât lơ̆m kơmăy sô̆ vă tơgŭm ăn dôm xăh, phường ƀônh hơlen năng păng tơlĕch jang tôch hơdăh.

Ƀok Phạm Anh Tuấn, Kơdră vei lăng kon pơlei dêh char Gia Lai pơma hơdăh: “Dôm anih jang kơpal akŏm jơhngâm pơm sơđơ̆ng, klăih song tơdrong jang păng pơjao tơdrong hơgăt mă rơđăh ăn rim tơdrong jang tơ̆ tơring. Mă loi hăm Kơdră chĕp kơ̆l, phŏ kơdră chĕp kơ̆l dôm anih jang kơpal athei chĭu pŭ hơnăp jang mă hơtuch tơ̆ anih jang kơdih kiơ̆ tơdrong hơgăt đei pơjao, pơtho tơƀôh ăn tơring trong bơ̆jang, đei hloi sek tơlang tơdrong ăn kon pơlei păng jang atŏk tơiung mŭk drăm, tơpôl. Dôm tơdrong ‘nâu athei tơmât lơ̆m kơmăy  điên tư, chih tơbăt hăm kơmăy sô̆ vă rim xăh phường năng kiơ̆ tơ̆ rim anih jang, năng lơ̆m noh vă băt trong sek tơlang rim tơdrong”.