Tơ̆ 'măng tơƀơ̆p hăm Ƀô̆ trương Jang tơbôl Lào Thongsavanh Phomvihane, 2 pah drơ̆ng nơ̆r pơtoi jang hơdoi kơjăp, tơgŭm dih băl lơ̆m dôm tơdrong hop akŏm lơ teh đak, mă kăl noh lơ̆m ASEAN păng dôm tơdrong jang hơdoi tơ̆ tơring Mekong; tơgŭm pơkăp jang đơ̆ng ASEAN gah dôm tơdrong jang kăl tơ̆ tơring, lơ̆m noh đei tơdrong Biển Đông. Lơ̆m 'măng tơƀơ̆p hăm Ƀô̆ trương Jang tơbôl Thái Lan Maris Sangiampongsa Phŏ Thủ tướng, Ƀô̆ trương Jang tơbôl Bùi Thanh Sơn drơ̆ng lăp păng sơkơ̆t hơdah tơdrong tơgŭm gah tơroh jang tơmang pơhiơ̆ lơ̆m tơring ASEAN; hơtŏk kơtang tơdrong jang hơdoi lơ̆m pơkăp ACMECS; atŭm hăm noh pơtruh nơ̆r hăm Thái Lan pơtoi pơm trong ƀônh ăn kon pơlei Việt hơrih jang xa tơ̆ Thái Lan. 

Lơ̆m 'măng tơƀơ̆p hăm Ƀô̆ trương Jang tơbôl păng Jang hơdoi apŭng plenh teh Campuchia Prak Sokhonn, 2 pah drơ̆ng nơ̆r pơtoi jang hơdoi kơjăp, adoi nhen hơtŏk rim anih jang tơm, anih jang tơ̆ tơring iŏk yua dôm tơdrong jang đei jơnei đơ̆ng dôm tơdrong jang hơdoi 2 pah oei đei dang ei, vă hơtŏk kơtang jang hơdoi tôm tơdrong jang, lơ̆m noh akŏm asong khul kơpal năm hơpeh hơpong dih băl, ming man anih jang kăl, trong nơnăm, 'măng sơlam teh, hơtŏk kơtang hloh tơdrong jang hơdoi tĕch pơdro, hơtŏk hơpeh hơpong kon pơlei, pơih să tơdrong jang hơdoi tơmang pơhiơ̆.