‘Năr 8/7, tơ̆l 1 sơnăm Tổng Bí thư Nguyễn Phú Trọng lôch hơchăng. Kon pơlei lơ̆m teh đak truh soh hlôt nhang ƀlŏk hơdơ̆r kơ nhap Tổng Bí thư Nguyễn Phú Trọng ƀlep ƀât soi tơƀlŏk blŭng a kơ năr ƀok lôch hơchăng. Kăn ƀô̆, đảng viên păng kon pơlei bơ̆n hơnơ̆ng ƀlŏk truh păng kŭp yom kơ 1 ‘nu bơngai đei đon rơgei tih kơ kăch mang Việt Nam, bơngai tơchĕng hơlen, bơngai chih pơcheh, jĭ hla kơ tơƀôh trong chong glung kơ Đảng.

Hăm hlŏh 57 sơnăm jang Đảng, jang tŏk kiơ̆ rim chăl kăch mang, ƀok Nguyễn Phú Trọng hlôi plang đĭ chăl arih kơdih ăn tơdrong jang đơ̆ng Đảng, đơ̆ng hơdrĕch hơdrung. Ƀok jĭ bơngai đei jơhngâm đon tơpăt ‘lơ̆ng păng bưng ai tih đơ̆ng 1 ‘nu linh cộng sản tơpăt ‘lơ̆ng, đĭ jơhngâm pơvih ăn Teh đak, pơvih ăn kon pơlei. Dôm kŏng tih tên, gĭt kăl đơ̆ng nhap Tổng Bí thư Nguyễn Phú Trọng ling lang pơ ‘nhŏ ăn teh đak păng kon pơlei. Nhap Tổng Bí thư Nguyễn Phú Trọng hlôi ‘măn lê̆ lơ tơdrong jơnei gĭt kăl đơ̆ng 1 ‘nu bơngai gơ̆h hơgei, bơngai tơchĕng hơlen, bơngai chih pơcheh, jĭ hla kơ tơƀôh trong chong glung kơ Đảng.

Jơhngâm đon ‘lơ̆ng đơ̆ng ƀok ‘nŏh jĭ bơngai đảng viên cộng sản tơpăt ‘lơ̆ng, đei bưng ai tih, jĭ bơngai tơm dơnơ̆m tơguăt đĭ đăng tơdrong mât 1 ƀơ̆r đon, drơ̆ng pơm nơ̆r đơ̆ng đĭ đăng Đảng, đĭ đăng kon pơlei, đĭ đăng khul linh. Hơnăn păng tơdrong jang, kŏng tih tên păng đon plang pơyơ̆r, tơdrong gơ̆h hơgei păng jơhngâm đon ‘lơ̆ng đơ̆nh nhap ƀok Tổng Bí thư Nguyễn Phú Trọng gô ling lang đei hơdai lơ̆m jơhnơr arih gơ̆h hơgei, ‘lơ̆ng hơiă kơ Đảng bơ̆n, hơdrĕch hơdrung bơ̆n, lơ̆m jơhngâm đon ‘mêm kơ eng, kŭp yom đơ̆ng kăn ƀô̆, đảng viên păng kon pơlei bơ̆n, lơ̆m jơhngâm ‘mêm băt đơ̆ng bôl boăl lơ̆m apŭng plenh teh.