Tung mê, i lối 1.500 toăng hngêi nếo pro ƀă vâ chê 450 toăng hngêi ki ‘mâi rơnêu. Kon Rẫy ƀă Đăk Hà cho péa tơring ki apoăng pê klêi tơdroăng pơkâ mê. Kong pơlê pơkâ troh mơ’nui khế 6, kô pê klêi tơdroăng tah hngêi pơtân ăm 2.740 rơpŏng kuăn pơlê.

Laga, nôkố ối 786 toăng hngêi dế pro, ki hên a mâu tơring Đăk Glei, Kon Plông, Tu Mrông. Tơdroăng cheăng pêi pro ối trâm hên xơpá mê cho hâi xing xoăng lối rơtal liăn kơjo kum pro hngêi ối ăm mơngế ai hnoăng ki kơtiê, mâu ngế kơtiê xơpá; mâu tíu pêi cheăng ki ê hâi pơtroh 13 rơtal liăn ki hiăng tơhrâ; Đăk Glei tá ai hên mơngế ki veăng kơjo kum. Pakĭng mê, tung pơlâ tí tăng ngăn, nếo châ hlo tơ’nôm lối 1.300 rơpŏng kal kơjo kum hngêi ối vâ tơniăn tung rêh ối ton hơnăm.