Bú 70m2 hngêi mê ai péa veăng koi, môi veăng ‘mot tơmối hlối ai tŭm hơpêap on ƀă hngêi tí dế, hngêi lĕm nếo hiăng gum rơpŏng hngêi jâ Nay H’Doănh, a thôn Mơ Nai Trang, cheăm Ia Piar, tơring Phú Thiện pêi pro tiô tơdroăng púi vâ tơná tơniăn hngêi ối. Hâi djâ tơmeăm lăm to ối hngêi nếo ki lĕm, rơdâ, jâ rơrêk tung hiâm mơno, tối: Hdrối nah, rơpŏng hngêi jâ rêh ối tung hngêi pơtân tơ’nhiê xi kơchoh drêng kong mêi, drêng kong tô pơ-oh. Nôkố ai hngêi tơtô krá lĕm, rơpŏng hngêi ôh pá tô tuăn ‘na hngêi ối, kô hmiân tuăn pêi cheăng kâ, tăng liăn ăm kuăn ‘nĕng châ hriâm tui lui.

Tơdroăng sôk ro dêi rơpŏng hngêi jâ Nay HDoănh xuân cho tơdroăng sôk ro tơdjuôm dêi 355 rơpŏng ki ê ki châ kơjo kum xut tah hngêi pơtân, hngêi xi kơchoh a tơring Phú Thiện.

“Châ Đảng, Tơnêi têa tơmâng mơjiâng pro ăm hngêi ối tiah kố, a phiu ro ‘nâng. Ôh tơmiât tơmá châ ai hngêi lĕm tiah kố. Mơnê rêm râ kăn, mơnê khu pêi tơdroăng cheăng hiăng kum rơpŏng hngêi á ai tơdroăng rêh ối lĕm tâ’’.

Tơdrêng ƀă tơring Phú Thiện, tơring Chư Prông – ki  ai lối 1.000 toăng hngêi pơtân, hngêi xi kơchoh kal tah lôi xuân dế mơ-eăm pêi tơƀrê vâ pê klêi tơdroăng tơná cheăng tro tiô pơkâ. ‘Nâi nhên kố cho tơdroăng cheăng pêi ki kal, ai pơxúa lĕm khât, Khu Hnê mơhno tơdroăng xut tah hngêi pơtân, hngêi xi kơchoh dêi tơring  hiăng xoăng mơnế tung khu pêi cheăng tí tăng ngăn, hnê mơhnhôk.

Pôa Đinh Văn Dũng, Kăn hnê ngăn Đảng tơring, Kăn hnê ngăn Hô̆i đong kuăn pơlê tơring Chư Prông, ngế pơkuâ khu hnê mơhno ăm nâi, tơring hiăng mơhnhôk tăng hên ngế, mơhnhôk veăng tơlo liăn, tơkŭm tah ki xơpá, tơbleăng pêi tơƀrê tơdroăng mơjiâng pro hngêi.

Tơdrêng amê, tơring hiăng pêi tơdjuôm tơdrêng ƀă kơxô̆ liăn 54 rơtal liăn vâ tơbleăng mơjiâng pro hngêi. Mâu cheăm mơdêk hnê tối, mơhnhôk kuăn pơlê mơhnhôk mâu nhong o xiâm ngế ki vâi vâ pro hngêi, nhong o tung pơlê, tơrŭm veăng ƀă mâu lêng, khu râ tung pơlê cheăm vâ veăng mơjiâng pro. Troh nôkố, tâi tâng kơxô̆ hngêi ki nếo mơjiâng pro ƀă hiăng ƀă ki hiăng pro kêi dêi tơring hiăng luâ 70%. Đảng ƀô̆ tơring dế thâ mơjiâng pro vâ rĕng klêi tâi tâng 997 toăng hngêi thế klêi hdrối hâi lơ 30/6/2025, tơniăn ai 100% rơpŏng kơtiê, vâ chê kơtiê ai hngêi ối lĕm..

“Tâng riên rêm hâi ngin tơkum mơhnhôk pêi pêi pro sap 8 troh 10 toăng hngêi. Rêm khế, rêm hneăng, Khu hnê mơhno dêi tơring tăng ngăn nếo mâu tơdroăng cheăng pêi vâ pơtối hnê mơhnhôk thế pêi khât vâ rĕng klêi; hlối mơhnhôk khu râ veăng tơmâng tăng tơ’nôm mơngế pêi pro vâ rĕng. Nôkố lâp tung tơring ai 75% hâi pêi pro dêi rơpŏng hngêi, ki u ối cho ngin mơhnhôk ing măt trâ̆n, mâu khu grup ƀă mâu lêng ki pro đông a cheăm tơring mê veăng pêi pro. Tơdrêng amê, mơdêk tơdroăng cheăng séa  ngăn tăng ngăn hâi pêi pro châ tơƀrê”.

Nôkố, kong pơlê Gia Lai hiăng pê klêi 93% tơdroăng pơkâ xut hngêi pơtân, hngêi xi kơchoh. Tung tâi tâng kơxô̆ 17 tơring, pơlê kong krâm, kong kơdrâm mê hiăng ai 10 tơring pê klêi pơkâ, mâu tơring ki u ối xuân châ sap 70% troh 90% tiô pơkâ. Tơdroăng mê ăm hlo hnoăng pơkuâ teăm tơdrêng, tro khât dêi rêm râ Đảng, ƀă veăng tơmâng dêi mâu khu cheăng kal kí ƀă ai veăng ‘no hnoăng dêi tâi tâng kuăn pơlê.

Tơdroăng pêi pro têa tah hngêi pơtân, hngêi xi kơchoh a Gia Lai mơhno ăm hlo nhên hnoăng pơkuâ rơkê ƀă mơ-eăm khât ing tơdroăng kal kí dêi rêm râ ủy Đảng. Ing kong pơlê troh cheăm, tơdroăng xoăng hnoăng cheăng pêi xoăng hâi khế pêi cheăng, pơtối rak luât hmâ hôp tơpui tơno rêm khế klêi mê tối mâu tơdroăng cheăng pêi rêm măng ting hiăng pro tơdroăng tơ’noăng pêi cheăng lâp lu.

Mâu khu tơrŭm cheăng Đảng pro xiâm, djâ troăng ahdrối tung tơdroăng mơhnhôk ing khu râ kuăn pơlê veăng tơlo liăn. Ing tơdroăng pơkâ pêi “Hơ-ui kum dêi rơpó, mâu hlá lĕm kum hlá tơchiê’’ ƀă tơdroăng “ngế ki lâi ai hnoăng veăng no hnoăng  pêi cheăng, ngế ki lâi ai tơmeăm kum tơmeăm’’ hiăng tơbleăng trâu troh lâp lu. Hên khu Kŏng an kong pơlê Binh đoân 15, mâu lêng gak tơkăng kong ƀă mâu đông lêng tung cheăm tơring hiăng rơtế ƀă dêi rơpó chiâng môi khu rơdêi tung tŭm tơdroăng vâ cheăm tơring mơjiâng pro chât rơpâu toăng hngêi ƀă hên mâu tơdroăng pơkâ, mê cho rơpâ má môi, rĕng má môi, krá má môi,… ăm mâu rơpóng kơtiê vâ chê kơtiê, rơpŏng ai hnoăng tơnêi têa ki kơtiê. Pôa Rah Lan Chung- Phŏ hnê ngăn Đảng kong pơlê, kăn hnê ngăn Vi ƀan kuăn pơlê dêi kong pơlê Gia Lai ăm ‘nâi:

“Tơdroăng xut tah hngêi pơtân, hngêi xi kơchoh thế châ tơbleăng ăm kuăn pơlê ‘nâi, môi tuăn, tơdâng, tơdrăng, tơniăn pro krá lĕm ƀă ai pơxúa. Thế mơhnhôk tăng hên khu râ ing kơ koan, tíu pêi cheăng, mâu lêng, khu mơdró, khu tơrŭm cheăng, mơngế ƀă kuăn pơlê, mơdêk séa ngăn, tăng ngăn, teăm tơdrêng khên kơdeăn, mơnê kơ mâu khu pú hên, mơngế ki ai hnoăng pêi cheăng kơhnâ pêi tâi ivá tơná’’.

Tơdroăng xut tah hngêi pơtân hngêi xi kơchoh a Gia Lai chiâng xiâm ki mơhnhôk rơdêi, vâ kuăn pơlê mơ-eăm mơnhông tơná hluăn kơtiê, tơmiăn tung rêh ối, veăng mơjiâng kong pơlê Gia Lai rế xông rơdêi, kro mơdróng, rơkê plĕng. Tung mê, mâu khu tơrŭm cheăng Đảng hiăng pơtối rak hnoăng cheăng cho ‘’Hlá cờ ki apoăng’’ chông djâ, tơdjêp ƀă pro môi tơdroăng mơhnhôk pêi cheăng trâu rơdâ ki tơrŭm môi tuăn dêi pó hdroâng mơngế, tiô troăng hơlâ mơnhông krá tơniăn a cheăm tơring kong pơlê.