Tiô Khu xiâm mơjiâng tơmeăm, lâp tơnêi têa ai 686 tơdroăng tơkêa bro hngêi ối pơlê pơla dế châ pêi pro ƀă 623 rơpâu toăng hngêi, tung mê 117 tơdroăng tơkêa bro hiăng kêi đeăng. Krê 5 khế apoăng hơnăm kố, hiăng kêi đeăng lối 22.600 toăng hngêi ƀă pơxiâm mơjiâng pro tơ’nôm 21 tơdroăng tơkêa bro nếo.

Ngế pro xiâm hnê ngăn Chin phuh mơnhên, mơjiâng hngêi ối pơlê pơla cho troăng hơlâ kum rêh ối pơlê pơla ki kal, tơniăn hnoăng ai tíu ối ăm kuăn pơlê, ki má lối cho mơngế ki pá puât. Ngế pro xiâm hnê ngăn tơnêi têa kheăn kơdeăn tơdroăng mơ-eăm dêi mâu kong pơlê, tơdrêng amê tối nhên ối hên pá puât kal tah lôi. Pơkâ xiâm troh hơnăm 2030 kêi đeăng 1 rơtuh toăng hngêi ối pơlê pơla, krê hơnăm 2025 cho 100 rơpâu toăng hngêi.

Ngế pro xiâm hnê ngăn tơnêi têa pơkâ mâu khu râ kăn pơkuâ, ki má lối cho ngế ối a ko, thế tơmâng tro tơdroăng, séa ngăn troăng hơlâ châ mung liăn, tơnêi tơníu, pro mơ-éa tơ’lêi hlâu má môi ăm kuăn pơlê ƀă khu tê mơdró.