Kiơ̆ tơdrong tơchơ̆t, Anih vei lăng choh jang xa păng cham char Đắk Lắk đei Khul kơdră chĕp kơ̆l đei: 1 ‘nu ƀok kơdră chĕp kơ̆l păng 8 ‘nu phŏ, 4 anih juăt jang, 9 anih jang găh sư păng 19 anih bơ̆ jang kŭm hăm Anih mong jên vei lăng, atŏk tơiung bri păng cham char, Anih pơgơ̆r pơjing tơring tơrang ‘nao.

Tơ̆ hop akŏm, kơdră chĕp kơ̆l anih vei lăng pơjao tơdrong tơchơ̆t pôk hơtŏk bơngai pơm Kơdră vei lăng Lăm jang, anih pơvih pơvăn găh sư vă hơmet pơ ‘lơ̆ng khul kơdră pơgơ̆r, pơm ‘lơ̆ng ăn tơdrong jang dôm tơdrong tơm tơ̆ hơnăp kơnh. Ƀok Nguyễn Minh Huấn – Kơdră Anih vei lăng choh jang xa păng cham char Đắk Lắk pơma hơdăh, athei tơplih ming đon tơchĕng, trong bơ̆ jang, hơlen năng dôm tơdrong bơ̆ jang, dôm tơdrong hơgăt tơ̆ anih jang, dôm trong vă hơnơ̆ng bơ̆jang tơ̆ hơnăp kơnh.