‘Măng pơma dơnuh hăm tơdrong vang akŏm đơ̆ng 35 ‘nu Kơdră chĕp kơ̆l păng bơngai tang măt ăn dôm teh đak jang lơ̆m khŭl, dôm teh đak jang hơdai păng tơmoi hơvơn đơ̆ng BRICS, kŭm hăm kơdră chĕp kơ̆l dôm anih jang apŭng plĕnh teh nhen Liên hợp quốc, Anih jang tĕch mơdro apŭng plĕnh teh (WTO), Anih jang pơgang apŭng plĕnh teh (WHO), dôm anih jang jên hu hơtŏk tơiung kơ apŭng plĕnh teh păng tơring.

Pơma tơ̆ hop akŏm, Thủ tướng Phạm Minh Chính pơma hơdăh hơnăp jang păng tơgop đơ̆ng dôm teh đak găh Pơbăh lơ̆m vei lăng jơ̆p plei teh. Thủ tướng tơlĕch ăn 3 nơ̆r apĭnh gĭt kăl, ‘lơ̆ng lơ̆m jang hơdai lơ pang kiơ̆ lơ̆m dôm tơdrong pơkăp kăl đơ̆ng Tơdrong tơchơ̆t Liên Hợp Quốc păng khôi luơ̆t apŭng plĕnh teh, pơtrŭt tĕch mơdro hiôk hian, pơyom tơdrong pơm tơm păng đei yua trŏ luơ̆t, trŏ ƀlep đơ̆ng dôm teh đak; hơtŏk jơhngơ̆m pran đơ̆ng kơmăy gơh hơgei (AI) vă pơyua ăn kon bơngai.