Ƀlep lơ̆m ‘măng vang năm Hop akŏm Kơdră kơpal BRICS pơih să păng jang kiơ̆ tơdrong jang ƀar păh tơ̆ Brazil, Thủ tướng Phạm Minh Chính hlôi sơng pơma dơnuh hăm Kơdră dhĕp pơgơ̆r Kŏng ty Granja Fujikura - mir pơgar choh jang sa să hăm kmăi kmŏk hơgei tơ̆ Brazil găh lơ̆m Khul jang Granja Fujikura kơ Nhật Bản. Thủ tướng Phạm Minh Chính tơbăt, Việt Nam tŏk bŏk pơtrŭt kơtang mơdro sa, tơmơt jên jang hăm Brazil, kơ yuơ lơ loh hôn bơnê kơ rim grŭp jang, hơnih mơdro sa Brazil pơtrut kơtang tơgoăt tơgoăl ou atŏk tơ iung. Thủ tướng ‘meh vă rim hơnih mơdro sa đei nơ̆r pơma pơtrut kơtang Việt Nam kĭ pơkăp FTA hăm khul MERCOSUR păng Tơdrong tơchơ̆t mơmat tat tơgŭm dŏng tơmơ̆t jên jang. Adoi ‘meh vă Kŏng ty hơnơ̆ng tơgoăt rim hơnih mơdro sa Việt Nam hăm rim hơnih mơdro sa Brazil. Thủ tướng sơkơ̆t hơdăh, tơdrong Kŏng ty Fujikura Quail Genetics jang hơdoi hăm Kŏng ty Trọng Khôi hơnhăk đei iŏk yoa hơ iă ăn pơ đĭ ƀar păh kơ yuơ Kŏng ty Trọng Khôi kơtang găh gen păng gô chă rong kon tơrong hăm kmăi kmŏk hơgei , lơ̆m hơnô̆ hơnăp kơnh, 2 hơnih mơdro sa gô tĕch mơdro lơ tơmam drăm tơ̆ ƀar teh đak, hơnhăk đei iŏk yoa kơ jăp hloh dơ̆ng.