Tơ̆ Anih bơ̆jang teh đak xăh Hòa Phú, dêh char Đắk Lắk, dôm năr blŭng khei 7 đĭ đei lơ kon pơlei năm pơm bơ̆n hla ar bơ̆jang. Jang đang chih jô̆ hla ar hô sơ trực tuyến păng iŏk kơ phiê̆u pơdreo hla ar, ƀok Nguyễn Thế Lâm, oei tơ̆ thôn 9, xăh Hòa Phú, tơroi, mă đơ̆ng dôm năr blŭng a bơ̆jang kiơ̆ tơdrong jang ‘nao atŭm hlôi đei dôm tơdrong tơplih tôch kơ ‘lơ̆ng lơ̆m bơ̆jang hơmet pơ ‘lơ̆ng bơ̆n hla ar bơ̆jang.

“Tơdrong hơiă hloh ‘noh ĭnh ƀôh pha hăm hơdrol ki,‘noh jĭ hơdrol ki athei răp gô, đang kơ ‘noh rim hla ar  pơm pơmat tat đang kơ ‘noh tơplih ƀơ̆t dâu, tơplih ƀơ̆t to mă lei dang ei ‘noh tă kơ tơplih kơsô̆ ngăl tŏk bŏk đei ƀôh lơ̆m tơdrong jang, đơ̆ng tơdrong jang rim năr kơ lu bơ̆n. Iŏk yua kơsô̆ ‘noh hla ar đei hơmet pơ ‘lơ̆ng tôch kơ hrĕnh păng đei yua ‘lơ̆ng”.

Lei lăi thoi noh mơ̆n, tơ̆ Anih bơ̆jang teh đak kơ phường Buôn Ma Thuột, dêh char Đắk Lắk, kon pơlei pơrĕng vă iŏk kơ sô̆ pơm bơ̆n hla ar. Ƀok Vũ Đức Hưởng, oei tơ̆ phường Ea Kao, dêh char Đắk Lắk roi tơbăt, mă đơ̆ng băt năr ‘nâu khŭl kơdră chĕp kơ̆l 2 tăl pơtơm tơmơ̆t bơ̆jang, rim hla ar gô kơtă pơm tơ̆ phường hơnih bơ̆n oei sa, mă lei yua đơ̆ng tơdrong joăt kơna sư oei năm tơ̆ anih bơ̆jang so kơ pơlei tơm Buôn Ma Thuột hơdrol ki vă pơm bơ̆n hla ar. Ƀok tôch kơ lăp đon yua kơ dôm hla ar tă kơ đei pơm hăm kơsô̆ ngăl, đơ̆ng tơdrong iŏk kơsô̆ tơrih truh ƀơ̆t bơngai jang sơng iŏk hla ar, pơdreo hla ar.

“Ĭnh năm tơ̆ âu vă tơplih hla ar lăp hơdrô̆ teh jing hla ar đei teh, hna hloi. Yua kơ hơnih ‘nâu ĭnh đĭ pơm joăt bơih păng đe pơm tôch kơ hrĕnh kơna ĭnh truh tơ̆ âu pơm. Pơma atŭm ‘noh sư pha ƀiơ̆ tŏ sĕt, tơdrong jang sư kŭm hlĭch ƀiơ̆ tŏ sĕt mă lei khŏm khŏm kŭm gô joăt. Đơ̆ng rŏng âu rŏ lăng kang ƀô̆ pơtho ‘noh bơ̆n băt ‘noh oei tơ̆ yơ pơm tơ̆ noh ‘noh ƀônh hloh. Oei dang ei ‘nao năr blŭng a ‘noh ĭnh oei năm tơ̆ hơnih so vă pơm hla ar đĕch”.

 Dôm năr âu ki, vă đĭ đăng kon pơlei truh tơ̆ dôm anih bơ̆jang teh đak tơ̆ dôm xăh, phường tơ̆ Đắk Lắk vă pơm bơ̆n hla ar kăl, nhen: hla ar chih hơnăn, sơnăm kon rơneh, hla ar roi tơbăt bơngai lôch, ƀao hiêm pơgang, pơm hla ar mơ̆t hŏk, hơlen lăng hơnih oei sa, pơm hla ar teh... Vă tơgŭm kon pơlei, rim kang ƀô̆, bơngai jang tơ̆ anih bơ̆jang teh đak kŭm hlôi hơdrin jang, pơm joăt hăm kơmăy yua hơdai lơ̆m bơ̆jang khŭl kơdră chĕp kơ̆l 2 tăl.

Ƀok Nguyễn Đăng Huy, bơngai jang lơ̆m Anih bơ̆jang teh đak kơ xăh Hòa Phú, dêh char Đắk Lắk tơroi, iŏk đơ̆ng bơ̆jang pơlong lăng tơdrong jang ‘nao, kang ƀô̆, bơngai jang lơ̆m anih jang nhen vă ưh kơ đei năr pơdơh. Đĭ đăng bơ̆jang truh tơ̆ kơmăng vă tơmơ̆t hrơ̆ch bơ̆n hla ar chih răk kăl, tơmơ̆t yua kơmăy 1 trong ƀônh hiôk, pơm lăp hăm ‘meh vă đơ̆ng kon pơlei.

“Đĭ đăng dôm bơngai bơ̆jang tơ̆ Anih bơ̆jang teh đak xăh Hòa Phú ‘nao truh đơ̆ng lơ bơngai kang ƀô̆ kơna tơdrong chih tơmơ̆t, băt hơdăh, iŏk yua kơmăy kơdâu pơlong lăng ‘noh sơđơ̆ng ‘lơ̆ng mă lei ƀơ̆t tơmơ̆t bơ̆jang đơ̆ng pơgê truh dang ei ‘noh kŭm đei dôm tơdrong nhen hla ar chih răk ƀơm truh kơmăy pơm hla ar oei ‘nao kơna tơdrong chih tơmơ̆t, hơmet kŭm tơƀơ̆p pơmat tat, mă lei ‘nhŏng oh kŭm tŏk bŏk tôch kơ hơdrin hơmet pơ ‘lơ̆ng”.

Tơ̆ dôm xăh, phường tơ̆ dêh char Đắk Lắk lơ̆m dôm năr âu, dôm grŭp joăt jang phần mềm păng bơngai jang ki thuơ̆t kơ Viễn thông Đắk Lắk (VNPT) kơtă tơgŭm kang ƀô̆ jang iŏk yua kơmăy pơvih pơvăn teh đak kŭm nhen tơgŭm kon pơlei năm pơm bơ̆n hla ar.

Kiơ̆ kơ ƀok Nguyễn Nam Quốc, Kơdră vei lăng Viễn thông Đắk Lắk, anih jang kŭm tơgŭm bơ̆n tơdrong jang hla ar chih răk tơgŭm kon pơlei gơh pơm bơ̆n hla ar trực tuyến. Hăm dêh char Đắk Lắk ‘nao, tơdrong pơhrăm, pơtho kang ƀô̆, bơngai jang dôm anih jang xăh, phường lơ̆m iŏk yua kơmăy yua hơdai hlôi đei tơlĕch jang đơ̆ng hơdrol, mă loi ‘noh jĭ hăm tơring dôm xăh, phường găh dêh char Phú Yên hơdrol ki, vă mưh tơplih jing iŏk yua kơmăy yua hơdai ‘nao ‘noh đe sư gơh pơm lăp đei hloi hơnih bơ̆jang. Ƀok Nguyễn Nam Quốc roi tơbăt:

“Nhen tơ̆ dêh char Đắk Lắk, mĭnh hơnih xăh phường ‘noh tă kơ đei hơmet ăn tôch ai 2 ‘nu bơngai joăt jang găh phần mềm păng 1 ‘nu bơngai jang ki thuơ̆t vă tơgŭm ăn, ưh kơ lê̆ đei dôm tơdrong đei ƀôh nhen ưh kơ gơh pơma dơnuh, ưh kơ tơgoăt kơmăy hơdai hơyơ tơ̆ dôm hơnih pơyua ăn kon pơlei. ‘Ngoăih kơ ‘noh VNPT Đắk Lắk kŭm tŏk bŏk pơjing dôm khŭl tơgŭm tơtĕnh păng dôm kơsô̆ điên thoăi kăl vă đĭ đăng dôm hơnih mă mưh đei dôm tơdrong truh hơyơ pơđĭ găh bơ̆n kơmăy, kŭm nhen tơdrong pơyua ăn kon pơlei mă đei pơgăn ‘noh gô đei tơgŭm tơtom hloh”.