Tơdrong hơnhăk tơdrong pơvih pơvăn đơ̆ng anoh mong jên truh hăm kon pơlei ưh pă đei nơ̆r pơma hŏh đĕch, mă oei jing trong jang tôch hơdăh lơ̆ lơ jăl trong teh gôh Tây Nguyên. Lơ gre đơ̆ng anih mong jên, đei hơmet tôm kơmăy kơmŏk, nhen vi tĭnh, kơmăy in, kơmăy jô̆ jên păng hơmet internet hlôi năm truh tơ̆ pơlei pơla hơtăih yăih kơ Tây Nguyên, pơih đei tơdrong ‘lơ̆ng mưh ‘mĕh tŏk iŏk jên ăn kon pơlei tơ̆ âu.

Tơplih ăn tơdrong athei yak truh dôm jĭt km nhen adrol sơ̆, mih ma duch nă dang ei pơm hla ar tŏk iŏk jên tôch ƀônh, tơdrong iŏk jên, kla jên kon dăh mă gơih jên mong răk tkơtă tơ̆ xăh kŭm tôch hiôk. Rim anih pơvih hăm gre đei pơm 2 tŏ kơƀang, jang hăm kơmăy ‘nao ngăl, pơm ƀônh hai, tơjur ƀơ̆ năr pơm hla ar hai. Tơdrong jang đơ̆ng dôm khul asong tŏk iŏk păng gre pơvih pơvăn hlôi hơnhăk kơ ti hlak jên tŏk iŏk hăm jên kon tŏ sĕt truh hăm kon pơlei tơ̆ tơring kon kông, vang tơgop tơgŭm ăn tơdrong choh jang xa păng jang atŏk tơiung mŭk drăm lơ̆m unh hnam.

Tơ̆ dêh char Đắk Lắk, truh ‘năr 30/6, Agribank hlôi asong tŏk iŏk truh 21.700 ti hlak jên, lơ̆m noh 2/3 ‘măn ăn tơdrong choh jang xa, hăm hlŏh 34.000 ‘nu bơngai đei tŏk iŏk. Ƀok Võ Tiến Nam, Phŏ Kơdră Agribank dêh char Đắk Lắk ăn tơbăt: “Mưh nhôn ăn gre jur jang tơ̆ tơring, kon pơlei hơmet jơ năr, pơm hla ar tŏk iŏk jên tôch hiôk hian. Mă lei, oei đei tơdrong pơmat tat ‘năi mưh năm truh tơ̆ tơring hơtăih yăih yoa kơmăy kơmŏk tam mă ‘lơ̆ng, tam mă pơm lăp hăm tơdrong ‘mĕh vă.”

Ưh lăp tơ̆ tơring dăh mă tơdrong asong tŏk iŏk jên đĕch, tơdrong tơmât yoa kơmăy kơmŏk ‘nao tŏk bŏk đei pơih xă, tơguăt ‘lơ̆ng rim tơdrong jang pha ra băl mât lơ̆m tơdrong jang mŭk drăm. Anih vei lăng kon pơlei dêh char Khánh Hòa pơjing Anih dăr lăng, pơgơ̆r jang rơgei, ‘nâu jĭ 1 hơyak tôch gĭt kăl mưh bơ̆ jang kiơ̆ tơdrong tơchơ̆t kơsô̆ 57 đơ̆ng Anih tơm Chinh trĭ găh  atŏk tơiung khoa hŏk, kơmăy kơmŏk păng tơplih hăm kơmăy sô̆, kŭm nhen tơdrong tơchơ̆t 68 găh atŏk tơiung mŭk drăm tơ̆ anih jang kơdih.

Anih âu đei 7 phần mềm, 15 tơdrong pơvih păng 22 tơdrong hơgăt, asong chih tơmât ‘lơ̆ng kon pơlei, anih tĕch mơdro păng khul kơdră tơring. Dôm kơsô̆ chih răk găh teh, tơdrong jang vă krao hơvơn tơmât jên jang tôch rơđăh, tơgŭm ăn anih tĕch mơdro chă hơlen năng tôch ƀônh, hrĕnh. Ƀok Nguyễn Tấn Tuân, sơ̆ pơm Kơdră vei lăng kon pơlei dêh char Khánh Hòa ăn tơbăt, tơdrong vei lăng hăm kơmăy sô̆ ưh lăp tơgop vang hơmet ming trong pơm hla ar đĕch mă oei pơih trong pơm hơtŏk tơdrong rơđăh rơđong mưh tơmât jên jang, pơjing anih tĕch mơdro hơtŏ ‘lơ̆ng: “Tơpă ‘nei, nhôn ưh đei trong tơƀâp hơdrô̆ hăm rim anih tĕch mơdro mă tơƀâp kiơ̆ đơ̆ng mang, yoa thoi noh veh ver đei tơdrong juăt băl dăh mă đei dôm tơdrong pơyoa nai. Nhôn ƀôh ‘nâu jĭ trong jang tôch rơđăh ăn dôm anih tĕch mơdro, rim anih tĕch mơdro tơtă hơtŏ băl ngăl mưh vang tơmât jên jang tơ̆ dêh char Khánh Hòa.”

Sơnăm 2025 jĭ sơnăm “jang tŏk pran, hrĕnh” đơ̆ng trong jang atŏk tơiung mŭk drăm - tơpôl 5 sơnăm 2021–2025, anih mong jên đei pơjao 2 tơdrong jang: vei lăng ‘lơ̆ng tơdrong jang mŭk drăm hai, pơjing tơdrong ‘lơ̆ng vă tŏk iŏk jên jang tŏk hai

Hrei ‘nâu, dôm dêh char găh Pơbăh kơ tơring Tŏk bŏk păng Tây Nguyên tŏk bŏk đei pơjao tơdrong jang tŏk GRDP đơ̆ng 8-13%. Anih mong jên teh đak hlôi tơlĕch jang ‘lơ̆ng lơ trong jang gĭt kăl. Anih mong jên teh đak tơlĕch trong tơjur jên kon, atŭm hăm ‘nŏh athei rim anih mong jên ‘mơ ‘met jên jang vă tơjur ƀiơ̆ jên kon. Jên asong tŏk iŏk kŭm đei hơmet ming, pơ ‘nhŏ hơdrol ăn dôm tơdrong jang nhen jang xa, tĕch tơmam tơ̆ teh đak đe, jang kơmăy tơgŭm păng anih tĕch mơdro iĕ păng păh lăp. Kŭm hăm ‘nŏh jĭ tơlĕch dôm trong asong tŏk iŏk jên hăm jên kon tŏ sĕt đơ̆ng teh đak, hue lăng truh dôm tơdrong pơ ‘nhŏ jang hơdrol nhen  atŏk tơiung choh jang xa păng tơring tơrang.

Ƀok Đào Minh Tú, Phŏ Kơdră chĕp kơ̆l Anih mong jên teh đak, anih mong jên chih hơdăh hơnăp jang gĭt kăl lơ̆m tơdrong vei lăng sơđơ̆ng mŭk drăm lơ̆m teh đak, tang găn kơjă tơmam tŏk hlŏh tơdrong vă pơjing tơdrong ‘lơ̆ng ăn tơdrong jang tŏk. Hăm tơdrong tơmât yoa hơdoi kơmăy kơmŏk, trong tơgŭm lăp ‘lơ̆ng păng jơhngâm đon bơ̆jang tôch kơchăng, rim anih mong jên vă hơnơ̆ng yak hơdoi hăm kon pơlei păng anih tĕch mơdro, tơgop hơnhăk teh đak yak tŏk pran kơjăp lơ̆m chăl jang tŏk hăm kơmăy sô̆, gơ̆h hơgei păng pran kơjăp.

Ƀok Đào Minh Tú tơroi dơ̆ng: “Hơtŏk iŏk yoa kơmăy kơmŏk mưh pơvih tơ̆ anih mong jên – 1 trong jang ưh gơ̆h veh lơ̆m chăl ‘nao, ‘nâu jĭ tơdrong jang kăch mang athei bơ̆jang mă pran. Anih mong jên athei năng ƀôh tơdrong ‘nŏh. Anih mong jên hlôi păng tŏk bŏk tơlĕch jang kiơ̆ kơmăy kơmŏk pơm thoi yơ vă gơ̆h jang roi ‘lơ̆ng, hiôk hian păng tơjur ƀiơ̆ jên huach ưh kơ kăl ăn anih tĕch mơdro. ‘Nŏh jĭ jên yak vih vât, jên pơm hla ar…ƀơm truh kơsô̆ jên tŏk iŏk, gô tơgŭm pơvih dôm tơdrong ‘lơ̆ng hlŏh đei yoa hlŏh păng jên huach tŏ sĕt hlŏh”.