Hop akŏm kơpal BRICS 2025 đei hơnăn "Hơtŏk jang hơdoi tơring Pơbah vă hơtŏk vei lăng tôm tơring păng kơjăp sơđơ̆ng hloh", jing minh lơ̆m dôm tơdrong hop akŏm lơ teh đak, đei tơdrong vang truh akŏm đơ̆ng pơhlom 20 kơdră kơpal dôm teh đak, Tổng thư ký Liên Hợp Quốc păng kơdră kơ lơ hơnih jang apŭng plenh teh.

Thủ tướng Phạm Minh Chính năm akŏm păng iung pơma lơ̆m 'măng Pơma đam kơpal gah hơnăn: Hơtŏk jang hăm lơ teh đak, dôm tơdrong jang mŭk drăm, jên hu păng gah trĭ tuê̆ nhơ̆n tăo; Cham char, COP 30 păng jang hơmet jĭ jăn lơ̆m apŭng plenh teh; păng năm akŏm Tơbang Tơchơ̆t atŭm kơ dôm Kơdră gah jên hu tŏ 'mi kial păng Pơtơm tơdrong jang hơdoi  BRICS gah hơmet klaih Pơrang jĭ lơ̆m tơpôl. Lơ̆m 2 năr pơgơ̆r hop akŏm, rim teh đak vang jang kơ BRICS akŏm lơ̆m dôm tơdrong, hơtŏk jang hơdoi lơ̆m tơdrong jang pơgang hơmet jĭ jăn, trĭ tuê̆ nhơ̆n tăo păng tŏ 'mi kial tơplih.